ԻԼՀԱՄ ԱԼԻԵՒԸ ՌՈՒՍԱՍՏԱՆԻՆ ՕԿՈՒՊԱՆՏ Է ՀԱՅՏԱՐԱՐԵԼ․ ՌՈՒՍԱՍՏԱՆԻ ԱԳՆ-Ն ԱՍԵԼԻՔ ՉՈՒՆԻ՞

«Ռուսաստանի և Ուկրաինայի միջև պատերազմի վերաբերյալ Ադրբեջանի դիրքորոշման մասին. մենք միշտ աջակցել ենք, աջակցում ենք և շարունակելու ենք աջակցել Ուկրաինայի տարածքային ամբողջականությանը և ինքնիշխանությանը»: Այսպիսի հայտարարությամբ հանդես է եկել Ադրբեջանի նախագահ Իլհամ Ալիևը «Դեպի նոր աշխարհակարգ» միջազգային համաժողովում, որն անցկացվել է 2025 թվականի ապրիլի 9-ին Բաքվի ADA համալսարանում։ 

Նրա խոսքերով ՝ «ակնկալել, որ Ուկրաինան կհամաձայնի զոհաբերել իր միջազգայնորեն ճանաչված տարածքը խաղաղության դիմաց, կարծում եմ, անարդար և անիրատեսական կլինի։ Ես անձամբ, լինելով իրատես, տեսանելի ապագայում Ուկրաինայի և Ռուսաստանի միջև խաղաղության ոչ մի հեռանկար չեմ տեսնում։ Ռուսաստանը բռնազավթված տարածքները հայտարարել Է Ռուսաստանի մաս։ Ուկրաինան, ինչպես ամբողջ աշխարհը, այդ բռնազավթված տարածքները համարում է Ուկրաինայի մաս, Ադրբեջանը նույնպես դրանք համարում Է դրանք Ուկրաինայի մաս։ Ինչպե՞ս կարող են նվիրաբերել դրանք և ասել ՝ ոչ, դա Ուկրաինայի մաս չէ։ Դե, եթե դա տեղի ունենա, դա նշանակում է, որ ես ինչ-որ բան չեմ հասկանում միջազգային քաղաքականությունից»։ 

Եվս մեկ մեջբերում Ադրբեջանի նախագահից. «Պատերազմներն ավարտվում են, երբ ստորագրվում է կապիտուլյացիայի վերջնական ակտը։ Ինչպես ասաց Խորվաթիայից մեր ընկերը (ֆորումի մասնակից Անտուն Դույմովիչը), նրանք ազատեցին իրենց տարածքը, դուրս եկան իրենց սահմանները և կանգ առան: Ահա թե ինչպես են ավարտվում իրական աշխարհի պատերազմները»:

Իլհամ Ալիևն, ըստ էության, Ռուսաստանին օկուպանտ է հայտարարել և կոչ արել Ուկրաինային հասնել Մոսկվայի լիակատար կապիտուլյացիայի։ Այս առնչությամբ հետաքրքրություն է ներկայացնում Ռուսաստանի Դաշնության իշխանությունների արձագանքը Ադրբեջանի նախագահի բացահայտ հակառուսական հայտարարություններին, Ադրբեջան, որ հանդիսավորությամբ հայտարարվել է ՌԴ ռազմավարական գործընկեր և դաշնակից: Իսկ արձագանք․.. չկա (!)․ Ընդհանրապես ոչ մի արձագանք: Զրո։ Քար լռություն: Աշխարհի տարբեր երկրներում հազարավոր դիտորդներ այժմ տարակուսանքով հարցնում են. «Ո՞նց թե։ Ռուսաստանի ռազմավարական գործընկերը, պետության առաջին դեմքի մակարդակով, պաշտոնապես Մոսկվային օկուպանտ է Հայտարարում, իսկ ի պատասխան ՝ լռությու՞ն։ Ասելիք չունի՞ անգամ ՌԴ ԱԳՆ մամուլի քարտուղար Մարիա Զախարովան (լուսանկարում), ով սովորաբար կայծակնային արագությամբ արձագանքում է Հայաստանում ցանկացած փռշտոցի»։ 

Չէ, մենք հասկանում ենք, իհարկե, որ Ադրբեջանի նախագահը ինչ-որ Լևոն Հայրապետյան չէ, ով հազարավոր ծառայություններ է մատուցել Ռուսաստանին և մտացածին պատրվակով բանտ նետվել, Ալիևին բանտ չես նետի։ Բայց կարելի է, չէ՞ գոնե դժգոհության նման ինչ-որ մի բան փնթփնթալ։ Ի վերջո, պետք է հասկանալ, որ կյանքում կան իրավիճակներ, երբ լռությունը միշտ չէ ոսկի: Որովհետև, ինչպես հներն  էին ասում, "Դրոշը կորցրե՞լ եք, պատիվն եք կորցրել։ Պատիվը կորցե՞լ եք, ամեն ինչ եք կորցրել»...

Վահրամ ԱՂԱՋԱՆՅԱՆ

«Երրորդ ՈՒժ Պլյուս» անկախ թերթի գլխավոր խմբագիր

www.hraparak.am