Թուրքիան արշավ է սկսում Իրանի դեմ

Թուրքիայի պետական հեռուստատեսության գլխավոր տնօրեն Զահիդ Սոբաջին, Բուրսա Ուլուդաղ համալսարանի հիմնադրման տարեդարձի առիթով կազմակերպված միջոցառմանը հայտարարել է, որ TRT մինչեւ տարեւերջ պարսկերենով հաղորդումներ է հեռարձակելու։ Զահիդ Սոբաջին հեռուստախցիկների դիմաց բառացիորեն ասել է․ «Մենք պետք է Իրանին անհանգստություն պատճառենք»։

Առանց այդ էլ Թուրքիան, օգտվելով արբանյակային կապի ընձեռած հնարավորությունից, տարիներ շարունակ թուրքերենով հեռարձակվող հեռուստաալիքների միջոցով Թուրքիայի ու Ադրբեջանի հետ սահմանակից իրանական նահանգներում պանթուրքիզմի քարոզով է զբաղված։ Ըստ երեւույթին, Անկարան որոշել է Իրանում ընդլայնել իր քարոզչության աշխարհագրությունը։

Տարօրինակն այն է, որ ներկայացուցչական միջոցառման մասնակիցներից եւ ոչ մեկը գլխավոր տնօրենին չի սաստել իր հակաիրանական արտահայտությունների համար։ Շատերին հետաքրքրող մյուս հարցն էլ այն է, թե արդյո՞ք Թուրքիայի պետական պաշտոնյան կարող էր առանց երկրի բարձրագույն ղեկավարության հետ համաձայնեցնելու, հարեւան երկրին ուղղված անխոհեմ ու սպառնալից հայտարարություններ անել։

Նման հարցերը կարող են հետաքրքրել նաեւ Թուրքիայի մյուս հարեւան երկրներին։

Գ․ Առաքելյան

www.azg.am

Newsfeed