13-ամյա պատանին ու 1800-ամյա մատանին

Իսրայելի հյուսիսում պատանին անսպասելի հայտնաբերել է 1800-ամյա մատանի հռոմեական աստվածուհու պատկերով, որի ձեռքին թուր է եւ գեղարդ։

Մատանու վրա, որը պատրաստված է բրոնզից, պատկերված է Միներվան՝ հունական Աթենասի հռոմեական անալոգը, միայն սաղավարտով։ Միներվան, որը տարածաշրջանում երկրպագվում էր հռոմեական դարաշրջանում, «համարվում է նաեւ պատերազմի եւ ռազմավարության, ինչպես նաեւ իմաստնության աստվածուհին»,- նշվել է Իսրայելի Հնությունների վարչության թալանի կանխման բաժնի հայտարարությունում։

13-ամյա Յաիր Ուայթսոնը մատանին գտել է հոր հետ Հայֆա կատարած արշավի ժամանակ։ Նրանք զբոսնում էին Քարմել լեռան հնագույն քարհանքի մոտ, երբ Յաիրը, որը սիրում է հետաքրքիր քարեր հավաքել, հողին նկատել է «փոքրիկ կանաչ առարկա»։ Նրա ընտանիքը արժեքավոր գտածոն հանձնել է Իսրայելի ազգային գանձերի վարչությանը։

Հետազոտողների խոսքով՝ փոքրիկ մատանին, ամենայն հավանականությամբ, պատկանել է կնոջ կամ աղջկա, որն ապրել է հին հռոմեական դարաշրջանում (մ.թ. II-III դարեր)։ Այն գտնվել է Հիրբեթ Շալալայում՝ հնագիտական հուշարձան բլրի գագաթին, քարհանքի կողքին, որտեղ գտնվում են հռոմեական դարաշրջանի մնացորդները։

Լրահոս