44-օրյա պատերազմում պարտության միջով անցնելով ձեռք ենք բերել ինքնիշխան պետություն ունենալու հնարավորություն. Փաշինյան

Հայաստանի Հանրապետությունը ոչ թե հենակետ է ավելի բարձր ազգային նպատակների հասնելու համար, այլ Հայաստանի Հանրապետությունը ինքն է մեր բարձրագույն ազգային նպատակը. այս ուղերձը փոխանցեցի ԱՄՆ հայ համայնքի հետ հանդիպման ժամանակ: Այս մասին հայտնել է Նիկոլ Փաշինյանը՝ կարճ տեսանյութ հրապարակելով:

ՀՀ-ում տեղի է ունենում գաղափարախոսական փոփոխություն: Այս մասին Վաշինգտոնում հայ համայնքի հետ հանդիպմանը ասել է Նիկոլ Փաշինյանը՝ նշելով, որ առաջինը իշխանության մեջ է այդ փոփոխությունը տեղի ունենում:

«Ոչ թե մեզնից առաջ իշխանությունը ուներ ուրիշ գաղափարախոսություն եւ մենք եկանք, հրաժարվեցինք իրենց գաղափախոսությունից եւ մենք գաղափարախոսությունն ենք դնում, այլ հիմա տեղի է ունենում գաղափարախոսական տրանսֆորմացիա: Իմ պատկերացմամբ՝ այսպիսի մի պատկերացում է եղել, որ ՀՀ-ն մի հենման կետ է ավելի բարձր նպատակների հասնելու համար: Այդ նպատակները, իմ համոզմամբ կապված է պատմական անցյալի հետ: Գաղափարախոսությունը փոխվում է հետեւյալը, որ ՀՀ-ն ինքն է բարձրագույն ազգային նպատակ եւ ՀՀ-ից ավելի բարձր ազգային նպատակ չի կարող լինել, եւ ՀՀ-ն ինքը ամենաբարձր նպատակն է, հետեւաբար շատ կարեւոր է կենտրոնաննալ ՀՀ գործառութային նշանակության վրա, որն է ապահովել սեփական քաղաքացիների անվտանգությունը, բարեկեցությունը եւ երջանիկ ապագան»,- ասում է նա:

Փաշինյանը նշում է, որ այս տրանսֆորմացիան տեղի է ունենում հայ ժողովրդի անցած ճանապարհի պատճառով:

«Այս գաղափարախոսությունն է միայն Հայաստանին լինելիության շանս տալիս: Մենք այս ամեն ինչին եկել ենք ա. 44 օրյա պատերազմի պարտության բերումով եւ այս պարտության պատճառների խորքային եւ ոչ խորքային պատճառները: Մենք, իմ գնահատմամբ, այսօր այդ պարտության միջով անցնելով ձեռք ենք բերել անկախ, ինքնիշխան պետություն ունենալու հնարավորություն: Ես երկար եմ մտածել եւ եկել այն եզրահանգման, որ զոհողությունները ոչ թե ոչնչի, այլ Հայաստանի ինքնիշխանության համար են եղել եւ մենք հիմա պարզապես պետք է կենտրոնանք այդ զոհողության հնարավորությունը օգտագործելու վրա»,- ասում է նա՝ նշելով, որ հեշտ չի լինելու:

www.azg.am

Լրահոս