Ադրբեջանը հայտնել է Լևոն Մնացականյանին առաջադրված մեղադրանքները

Ադրբեջանի գլխավոր դատախազությունը հանդես է եկել հայտարարությամբ՝ նշելով, թե ինչ մեղադրանքներ են ներկայացվել Արցախի պաշտպանության նախկին նախարար Լևոն Մնացականյանին։

Հաղորդագրության մեջ նշված է.

«Քննությամբ հիմնավոր կասկածներ են հաստատվել առ այն, որ Լևոն Հենրիկի Մնացականյանը, ով ծնվել է 1965 թվականին եւ բնակվել է Ադրբեջանի Խոջավենդի շրջանում, ՀՀ նախկին զինծառայող է, 2013-2018 թվականներին  մտացածին ռեժիմի «պաշտպանության նախարար» աշխատած, ինչպես նաեւ Ադրբեջանի տարածքում գործող անօրինական ռազմական զինված խմբի անդամ, 2002թ. մայիսի 8-ին մի խումբ անձանց հետ համաձայնության գալով, Ֆիզուլիի շրջանի Ալխանլի գյուղի տարածքում գերի է վերցրել Մամեդով Իլհամ Յուսիֆ օղլուին, որին մինչեւ նոյեմբերի 19-ը գերության մեջ էր պահել, ինչպես նաեւ այլ ադրբեջանցիների եւ ազգային ատելության հողի վրա նրանց բազմաթիվ կտտանքների է ենթարկել Ֆիզուլիում տեղակայված զորամասում:

2006 թվականի նոյեմբերի 8-ին որոշում է կայացվել Լյովա Մնացականյանին Ադրբեջանի քրեական օրենսգրքի 113-րդ հոդվածով որպես մեղադրյալ ներգրավելու մասին, նույն թվականի նոյեմբերի 14-ին նրա նկատմամբ համապատասխան դատարանի որոշմամբ խափանման միջոց է ընտրվել կալանավորումը եւ Ինտերպոլի գծով հայտարարվել միջազգային հետախուզում:

Այս տարվա սեպտեմբերի 29-ին Մնացականյանը ձերբակալվել է Լաչին  անցակետով Հայաստան անցնելիս եւ հանձնվել քննությանը, նրան մեղադրանք է առաջադրվել վերը նշված հոդվածով»: