Ադրբեջանը հույս ունի ամերիկյան ընկերության աջակցությամբ ոչ ավանդական նավթային խոշոր հանքավայր հայտնաբերել

Ադրբեջանը հույս ունի ամերիկյան Exxon Mobil ընկերության աջակցությամբ հայտնաբերել խոշոր ոչ ավանդական նավթային հանքավայր, հաղորդում է ադրբեջանական Minval լրատվամիջոցը։

Դրա մասին հայտարարել է էկոնոմիկայի նախարար Միքայիլ Ջաբարովը նախարարների կաբինետի հատուկ նիստում՝ նվիրված նախագահ Իլհամ Ալիևի վաշինգտոնյան այցին։

Ըստ նրա՝ SOCAR-ի և Exxon Mobil-ի միջև համագործակցության հուշագրի ստորագրումը դրական ազդեցություն կունենա էներգետիկ համագործակցության զարգացման վրա։

Ջաբարովն ընդգծել է, որ Վաշինգտոնում անցկացված հանդիպումներում «հատկապես նշվել է Ադրբեջանի դերը տարածաշրջանային և համաշխարհային էներգետիկ անվտանգության ապահովման գործում». այսօր երկիրը գազ է մատակարարում ԱՄՆ 10 դաշնակիցների և ընդհանուր առմամբ 14 երկրների՝ խողովակաշարերի միջոցով։ Վերջերս սկսվել է գազի մատակարարումը Սիրիա։

ԱՄՆ-ը դրական է գնահատել Ադրբեջանի մասնակցությունը իր դաշնակիցների՝ Իսրայելի և ԱՄԷ-ի նավթագազային նախագծերին։

Նա հավելել է, որ Ադրբեջանի էներգետիկ ռեսուրսները, դրանց թվում՝ վերականգնվող էներգիան, երկիրը գրավիչ են դարձնում տվյալների կենտրոններում և արհեստական բանականության տեխնոլոգիաներում ներդրումների համար։

Ըստ Ջաբարովի՝ Ադրբեջանը «անփոխարինելի դեր է խաղում Կենտրոնական Ասիայի և Հարավային Կովկասի միջև նախագծերի իրականացման գործում»։

www.news.am

Լրահոս