ԱԴՐԲԵՋԱՆԸ ՌԱԶՄԱԿԱՆ ԳՈՐԾՈՂՈՒԹՅՈՒՆՆԵՐԻ ԳՆԱԼՈՒ Ի ՎԻՃԱԿԻ ՉԷ ԵՒ ՑԱՆԿՈՒԹՅՈՒՆ ԷԼ ՉՈՒՆԻ

Ադրբեջանի նախագահ Իլհամ Ալիեւն օկուպացված Ստեփանակերտում, այսպես կոչված, ADA միջազգային ֆորումի ժամանակ հերթական հակահայկական հայտարարությունն է արել, թե ռազմական բախման վտանգը միշտ էլ կլինի, քանի դեռ Հայաստանը փաստաթղթի վրա չի ամրագրել «Ադրբեջանի տարածքային ամբողջականության հանդեպ նկրտումներից հրաժարումն ու իր գործողություններում անկեղծություն չի դրսեւորել»:

ՀՀ արտակարգ եւ լիազոր դեսպան Ձյունիկ Աղաջանյանից «Հրապարակը» հետաքրքրվեց` արդյոք խոշոր խաղացողները թույլ կտա՞ն Ադրբեջանին՝ Հայաստանի դեմ ռազմական գործողություններ հրահրել: Դիվանագետն ասաց, որ Ալիեւի այդ խոսույթը հերթական կեղծիքների շարքից է, քանի որ Ադրբեջանին որեւէ փաստաթուղթ կամ որեւէ ձեւակերպում անհրաժեշտ չէ՝ սադրանքների միջոցով ռազմական գործողություններ հրահրելու համար: «Դրա վկայությունը 2023 թվականին Արցախի հանդեպ լայնածավալ հարձակումը, ագրեսիան էր: Ուղղակի իրենք այդպիսի շինծու պատմության վրա փորձեցին ձեւակերպել եւ անվանել հակաահաբեկչական գործողություն: Ադրբեջանի համար ոչ մի խնդիր չկա՝ ինչ-որ մի հորինովի իրավիճակ ստեղծել, դա փորձելով ներկայացնել հիմնավորում՝ իրենց գործողությունների համար: Այլ խնդիր է, որ այս պահի դրությամբ Ադրբեջանը ցանկություն չունի եւ կարողություն չունի լայնամասշտաբ գործողությունների գնալու, որովհետեւ նախորդիվ իրականացված գործողությունները եղել են ամբողջովին համաձայնեցված եւ կազմակերպված թե՛ արեւմտյան կենտրոնների եւ նրանց հետ ձեռք-ձեռքի տված գործող թուրքական կողմի հետ եւ թե՛ նաեւ հայաստանյան իշխանությունների հետ, քանի որ գործողությունները համադրված են եղել, որը բերել է պարտության, որպեսզի արդարացվի Արցախի հանձնումն Ադրբեջանին»:

Ձյունիկ Աղաջանյանը կարծում է, որ նրանք հույս ունեին, թե հետագայում արցախահայերը հանգամանքների եւ իրավիճակի պարտադրանքով կհամաձայնեին Ադրբեջանի հպատակությունն ընդունել, ինչը, բնականաբար, չեղավ, քանի որ ժողովուրդը սեփական ինքնության որոշման ու սեփական կամքը թելադրելու ճանապարհն անցել էր, հստակ կամք դրսեւորել՝ 1991 թվականին անցկացված հանրաքվեով հռչակելով անկախություն, եւ չէր կարող որեւէ կերպ հանդուրժել իր ոչնչացումը տենչացող թշնամու ներքո որեւէ գոյության հնարավորություն:

«Ինչ վերաբերում է այսօր գերտերությունների կողմից թույլ տալուն կամ չտալուն, հաշվի առնելով այն, որ այսօր Միացյալ Նահանգներն ու Ռուսաստանի Դաշնությունը բանակցում են հարաբերությունների կարգավորման եւ ուկրաինական հակամարտության կասեցման ուղղությամբ, քանի որ ամերիկյան կողմն ավելի շատ խոսում է ռազմական գործողությունների դադարեցման մասին, իսկ ռուսական կողմը՝ հակամարտության ամբողջական կարգավորման մասին, որոնք երկուսն էլ տարբեր ենթատեքստեր են ակնկալում: Եվ այդ հանգամանքների բերումով այսօր Հարավային Կովկասում ռազմական բնույթի որեւէ գործողություն, բնականաբար, ցանկալի չէ Ռուսաստանի համար, որպես իր համար զգայուն եւ կարեւոր տարածաշրջան: Եվ ներկա պահի դրությամբ նաեւ ԱՄՆ-ն փորձում է խուսափել՝ հաշվի առնելով այն զգայունության աստիճանը, որ կա Ռուսաստանի համար այս տարածաշրջանում, եւ դրա բացասական հետեւանքները` իրենց սկսած բանակցային գործընթացն առաջ տանելու համար»,- ասաց Աղաջանյանը:

Այլ խնդիր է, որ արեւմտյան ուրիշ կենտրոնների համար նախընտրելի է այստեղ ռազմական գործողություններ սկսելը, օրինակ` Մեծ Բրիտանիան, Իսրայելը ցանկանում են, որովհետեւ այդ պարագայում երկրորդ ճակատի հանգամանքն է ստեղծվում, ինչն էապես բարդացնելու է Ռուսաստանի դիրքերը եւ զարգացումների ընթացքն ուկրաինական ճակատում: Հնարավորություն է ստեղծելու Իրանի դեմ բազմաճակատ գործողություններ իրականացնել՝ իրենց հաղթանակի հնարավորությունը մեծացնելով: «Սակայն ես հույս ունեմ, որ գոնե առաջիկա մի քանի շաբաթների կամ գուցե ամիսների ընթացքում մենք չենք տեսնի ռազմական գործողություններ՝ հաշվի առնելով Իրանի բավականին հմուտ դիվանագիտությունը եւ Ռուսաստանի կողմից տարվող դիվանագիտական քայլերը, որոնցով փորձում են ամեն ինչ անել` այս տարածաշրջանում ապակայունացում թույլ չտալու համար»,- եզրափակեց Ձյունիկ Աղաջանյանը:

www.hraparak.am