Ամերիկյան ԶԼՄ-ները տեղեկացել են՝ ինչպես է պատրաստվել ԱՄՆ-ի և ՌԴ-ի միջև գերիների լայնածավալ փոխանակումը

CNN-ն իր հեռարձակման մեջ, վկայակոչելով անանուն ամերիկացի պաշտոնյային, խոսել է Ռուսաստանի հետ գերիների փոխանակման բանակցությունների մանրամասների մասին։

Հիմնական գործակալությունը, որը բանակցել է ԿՀՎ-ն և նրա տնօրեն Ուիլյամ Բերնսն է եղել (որ ժամանակին Ռուսաստանում ԱՄՆ դեսպանն էր), հայտնում է BBC-ն։ Բանակցություններ են տարվել ռուսական հետախուզության հետ՝ անձնական հանդիպումներով և հեռախոսով։

Այս տարվա հունիսին հետախուզության ներկայացուցիչները հանդիպել են «երրորդ երկրի» տարածքում։ Այնտեղ ԱՄՆ-ն առաջարկ է ներկայացրել այս ժամերին տեղի ունեցող փոխանակման պարամետրերի վերաբերյալ։ Մի քանի օր անց Ռուսաստանի ներկայացուցիչները Բերնսի հետ զրույցի ժամանակ «սկզբունքորեն համաձայնություն» են տվել այս ձևաչափով փոխանակմանը։ Համաձայնությամբ պաշտոնական պատասխանը ռուսները հայտարարել էին հուլիսի կեսերին նույն խողովակով։

The Wall Street Journal-ը մանրամասներ է ներկայացրել նաև փոխանակման կազմակերպման վերաբերյալ։ Թերթի տվյալներով՝ Սպիտակ տան պաշտոնյաները, դիվանագետները և հետախուզության անդամները բանակցություններ էին վարում Եվրոպայի և Մերձավոր Արևելքի երկրների հետ՝ փնտրելով երկրներ, որոնք կհամաձայնեին ազատ արձակել ռուս լրտեսներին՝ Ռուսաստանում ամերիկացիների փոխարեն։

Հուլիսի 21-ին ԱՄՆ նախագահ Ջո Բայդենը, ընտրապայքարից դուրս գալու մասին հայտարարելուց ընդամենը մեկ ժամ առաջ, զանգահարեց Սլովենիայի վարչապետին՝ բանակցելու լրտեսության համար դատապարտված երկու ռուսների փոխանակման շուրջ (խոսքը, ըստ ամենայնի, ամուսիններ Արտեմի և Աննա Դուլցևների մասին է): Իսկ ԿՀՎ տնօրեն Ուիլյամ Բըրնսը անցած շաբաթ գնաց Թուրքիա՝ տեղական հետախուզության հետ բանակցություններ վարելու. փոխանակման նյութատեխնիկական ապահովումն այնտեղ ավարտվեց։

Գործարքի կենտրոնը ռուս Վադիմ Կրասիկովն էր՝ դատապարտված Բեռլինում Չեչնիայի նախկին դաշտային հրամանատար Զելիմխան Խանգոշվիլիի սպանության համար։ Հետախուզության բարձրաստիճան պաշտոնյաները հասկացրել են Միացյալ Նահանգներին, որ առանց Կրասիկովի Գերշկովիչի, Ուիլանի և այլ բանտարկյալների վերադարձը տեղի չի ունենա։ Գերմանական իշխանությունները, ի վերջո, համաձայնեցին նման փոխանակմանը՝ դրա համար պահանջելով ավելի քան 10 ռուս գերիների։

Լրահոս