
07-02-2025 | 12:13
ԱՄՆ-ում Ռուսաստանի դեսպան Անատոլի Անտոնովը, ըստ ամենայնի, տեսանելի ապագայում կվերադառնա հայրենիք, գրում է «Коммерсантъ»-ը։
«Սրտանց շնորհավորում եմ ձեզ ПИР կենտրոնի 30-ամյակի առթիվ: Ինձ համար մեծ պատիվ է աշխատել կենտրոնի հետ գրեթե հիմնադրման պահից՝ 1994 թվականից և այս ամբողջ ընթացքում աջակցել Ձեր թիմի անխոնջ գործունեությանը՝ ի շահ հայրենիքի։ Երեք տասնամյակ շարունակ կենտրոնը ծառայել է որպես խոր փորձաքննության և միջազգային անվտանգության ապահովման նվիրվածության օրինակ: Դուք նշանակալի ներդրում եք ունեցել սպառազինությունների չտարածման, վերահսկման և գլոբալ կայունության արդի խնդիրների ուսումնասիրության մեջ՝ դառնալով առաջատար վերլուծական հարթակներից մեկը ոչ միայն Ռուսաստանում, այլև արտերկրում»,- ասված է ПИР կենտրոնի հիմնադիր և տնօրեն Վլադիմիր Օրլովին ուղղված նամակում։
Միևնույն ժամանակ, նամակի վերջում, Անատոլի Անտոնովի ձեռագրով ավելացված է. «Գործուղումս ավարտվում է։ Հուսով եմ՝ միասին կշարունակենք պաշտպանել հայրենիքի շահերը»։
ПИР կենտրոնը միջազգային անվտանգության ոլորտում հետազոտական, կրթական և հրատարակչական գործունեության մեջ մասնագիտացած վերլուծական կենտրոն և արտաքին քաղաքականության ոլորտում Ռուսաստանի առաջատար հասարակական կազմակերպություն է։ Կենտրոնը խորհրդատվական կարգավիճակ ունի ՄԱԿ-ի տնտեսական և սոցիալական խորհրդում։
ՌԴ ԱԳՆ պաշտոնական ներկայացուցիչ Մարիա Զախարովան, մեկնաբանելով այս տեղեկությունը, հայտարարել է, որ այս հարցում մեկնաբանության պատճառ չկա, «ցանկացած մարդ կարող են անձնական ծրագրեր ունենալ»։
«Դեսպանների նշանակման և փոխարինման մասին որոշումներն ընդունում է նախագահը»,- հավելել է Զախարովան։