Ամո՛թ ձեզ, դուք ընտրել եք կանգնել այն մարդու կողքին, ով դավադրաբար պատրաստվում է զիջել Հայաստանի ինքնիշխանությունը. բաց նամակ՝ ուղղված տիրադավներից Հովնան Տերտերյանին

ՀՅԴ Արևմտյան Ամերիկայի Կենտրոնական կոմիտեի անդամ Վիգեն Սոսիկյանը բաց նամակ է հղել՝ ուղղված ԱՄՆ Արևմտյան Թեմի առաջնորդ Հովնան արքեպիսկոպոս Տերտերյանին, ով տիրադավների հետ միացել է եկեղեցու դեմ Նիկոլ Փաշինյանի արշավին։

«Գուցե Դուք ժողովրդի հարաբերական լռությունը շփոթել եք ընդունման և հանդուրժողականության հետ։

Եկեղեցու դեմ Արցախի կործանողի հետ միավորվելով՝ դուք ուղղակիորեն խախտում եք Եկեղեցու յուրաքանչյուր իրավական և բարոյական օրենք։

Դուք ընտրել եք կանգնել այն մարդու կողքին, ով հայտարարեց Արցախը Ադրբեջանի մաս։ Այդպիսով դուք ձեր աջակցությունն ու ընդունումն եք տվել Արցախի հարյուրավոր հայկական եկեղեցիների և վանքերի հանձնմանը։

Դուք ընտրել եք կանգնել այն մարդու կողքին, ով խոստովանել է, որ 2020 թվականի պատերազմը հնարավոր էր կանխել, սակայն ընտրեց պատերազմը, որպեսզի իրեն դավաճան չկոչեն։ Այդպիսով դուք աջակցություն եք հայտնել մի ամբողջ սերնդի զոհաբերմանը՝ հանուն այն մարդու քաղաքական երկարատևության, ով 2008 թվականին Արցախի ժողովրդին անվանել էր «ղարաբաղցի տականք»։

Դուք ընտրել եք կանգնել այն մարդու կողքին, ով դավադրաբար պատրաստվում է զիջել Հայաստանի ինքնիշխանությունը՝ հանուն մի անհասկանալի «խաղաղության», որը չի պարունակում ոչ մի երաշխիք և ոչ մի հստակ ու համաձայնեցված օգուտ Հայաստանի համար։ Այդպիսով դուք՝ Փաշինյանի հետ միասին, աջակցություն եք հայտնում Ադրբեջանին, Թուրքիային և ԱՄՆ-ին՝ ընդդեմ Հայաստանի շահերի։

Սրբազան Հայր, ձեր ստորագրությամբ այս փաստաթղթի տակ դուք անցել եք անդառնալիության սահմանը։ Ամոթ ձեզ՝ Սուրբ Հայ Առաքելական Եկեղեցին և ամբողջ ազգը դավաճանելու համար։

Ներկայումս, ձեր հակաեկեղեցական և հակահայկական գործողությունների արդյունքում, Հյուսիսային Ամերիկայի Հայ Առաքելական Եկեղեցու Արևմտյան Թեմը գտնվում է օկուպացիայի տակ։

Եկեղեցու ազատագրումը և նրա վերադարձը Քրիստոսի ընտանիք կախված է ձեր ապաշխարությունից և ընթացքի ուղղումից։ Անձամբ ես, քանի դեռ դուք կարգալույծ չեք եղել, կշարունակեմ ձեզ ճանաչել որպես Թեմի առաջնորդ, սակայն պահանջում եմ ձեր հրաժարականը՝ որպես առաջին քայլ՝ Թեմը մաքրելու այն բծից, որը դուք բերել եք նրա վրա։

Հարգանքով՝

Մի հավատավոր հայ

Թող Ամենակալը ողորմի նրանց, ովքեր լռում են՝ սատանայի բացահայտ հարձակման պայմաններում Քրիստոսի Տան վրա։

----

Կիրակի օրը Փաշինյանը և տասը դավաճան հոգևորականներ հրապարակեցին բաց նամակ՝ ներկայացնելով այն ուղին, որով նախատեսում են իրականացնել Հայ Եկեղեցու դեմ իրենց ներխուժումը։ Այս բաց նամակը պատասխան է նրանց գործած ծանր մեղքին»,- ասվում է նամակում։

www.aysor.am