Արևմուտքը դեռ շատ է խոսելու նիկոլական ռեժիմի կողմից ՀՀ-ում մարդու իրավունքների և ժողովրդավարական արժեքների ոտնահարման մասին՝ հատկապես ռեժիմի տապալումից հետո․ Նարեկ Սամսոնյան

«Քաղաքացիական գիտակցություն» ՀԿ ղեկավար, AntiFake.am կայքի հիմնադիր, «Իմնեմնիմի» փոդքասթի համահեղինակ և վարող Նարեկ Սամսոնյանը հոդված է հրապարակել «Արմավիր» քրեակատարողական հիմնարկից։

«Տեղեկացա Եվրոպայի խորհրդի լրագրողների անվտանգության հարթակի՝ մեզ կալանավորելու և AntiFake.am կայքի աշխատանքային գույքն առգրավելու մասին արված առաջին աստիճանի ահազանգի մասին, որը հնարավոր է դարձել Հայաստանի ժուռնալիստների միության գործուն ջանքերով և Քաղաքական իրավունքների հայկական կենտրոնի փաստահեն զեկույցին հղում անելով։ Նախ, ցանկանում եմ արձանագրել, որ մեր օրերում ԵԽ-ից նմանատիպ արձագանք ստանալն արդեն իսկ կարելի է «հերոսություն» համարել։ Այս համատքստում ցանկանում եմ իմ խորին շնորհակալությունը հայտնել և՛ ՀԺՄ-ին, և՛ ՔԻՀԿ-ին, և՛ մեր թիմին արևմտյան կառույցների դռներն անդադար թակելու և մեր հանդեպ տեղի ունեցող քաղաքական հալածանքի մասշտաբները տեղ հասցնելու համար։

Այս արձագանքը փաստում է, որ անգամ ռեժիմի քաղաքական հովանավորները ճիշտ աշխատանքի դեպքում չեն կարող աչք փակել տեղի ունեցող հալածանքների վրա։ Սրանով եվրոպացիները նաև հնարավորություն են ստանում ռեժիմի հեռացումից հետո «face saving» անելու և ասելու, որ իրենք արձագանքել են և բնավ կապ չունեն նիկոլական իրավապահ համակարգի այլանդակությունների հետ։ ԵԽ-ի այս արձագանքը վստահաբար նաև տհաճ անակնկալ է ռեժիմի համար, որն ալեն սիմոնյանի անառողջ ամբիցիաներին տուրք տալով ոչնչի համար կալանավորել է ինձ ու Վազգենին։

Ինչպես ասել եմ նախկինում, հիմա էլ պնդում եմ, որ այս այլանդակության բոլոր անմիջական մասնակիցները չեն խուսափելու պատասխանատվությունից ոչ հեռավոր ապագայում, ինչում, հուսով եմ, իրենք էլ ավելի պետք է համոզվեն ԵԽ-ի սույն արձագանքը տեսնելով։ Ամենավերջում ռեժիմը երկրում տեղի ունեցող քաղաքական հալածանքների ողջ իրավական պատասխանատվությունը թողնելու է այն իրականացնող ամենաստորին օղակների վրա։

Եվս մեկ անգամ ընդգծելով ԵԽ արձագանքի կարևորությունը, ցանկանում եմ խոսքս ուղղել բոլոր մեր այն գործընկերներին, որոնք երբեմն հեգնում, երբեմն հանդիմանում են ինձ և իմ պես մտածողներին նմանատիպ իրավիճակներում արևմտյան կառույցներին դիմումներ, ուղերձներ կամ պահանջներ ներկայացնելու համար.

Հարգելի՛ գործընկերներ, մարդու իրավունքներն ու ժողովրդավարական արժեքները համոզմունքներ են, իսկ արևմտյան կառույցները՝ դրանք խթանելու և դրանց դեմ արվող ոտնձգությունները կանխելու պարտավորություն ստանձնած ինստիտուտներ։ Եվ, եթե անգամ վերջիններս ինչ-ինչ շահերից ելնելով աչք են փակում մարդու իրավունքների և ժողովրդավարական արժեքների ոտնահարման դեպքերի վրա, այդ արժեհամակարգն ու համոզմունքները կրողները չպետք է հիասթափվեն և դադարեցնեն պահանջները։ Ես այդ արժեհամակարգի հավատավոր հետևորդն եմ և, եթե անգամ վստահ լինեմ, որ որևէ արձագանքի չեմ արժանանալու, միևնույնն է, գոնե միայն պատմության համար անդադար խոսելու և պահանջելու եմ այդ կառույցներից իրենց պարտականությունների կատարումը։

Այնպես որ, Արևմուտքը դեռ շատ է խոսելու նիկոլական ռեժիմի կողմից Հայաստանում մարդու իրավունքների և ժողովրդավարական արժեքների ոտնահարման մասին թեկուզ և հատկապես ռեժիմի տապալումից հետո։

Երիցս շնորհակալ եմ ԵԽ արձագանքն իրական դարձնելու մեջ ներգրավված անձանց և կառույցներին։ Լավ եղեք, մինչ հանդիպում»,- նշված է հոդվածում։

www.aysor.am