Արցախցին չի ապրելու Ադրբեջանի անձնագրերով, այդ ընտրությունը արել ենք 2023-ի սեպտեմբերին. Մետաքսե Հակոբյան

Մենք որևէ փոփոխություն կամ կարգավորում չենք արել անձերի շուրջ, մենք կարևորել ենք Արցախի նախագահի ինստիտուտի պահպանումը։ Այս մասին «Եռաբլուր» զինվորական պանթեոնում լրագրողների հետ զրույցում ասաց Արցախի Հանրապետության Ազգային ժողովի «Արդարություն» խմբակցության պատգամավոր Մետաքսե Հակոբյանը՝ անդրադառնալով Արցախի Սահմանադրության մեջ կատարված փոփոխություններին։

Նա վստահեցրեց, որ Արցախի նախագահի ինստիտուտը պահպանված է, շարունակելու է աշխատել, հենց ժամանակը մոտենա, անպայման հայտարարությամբ հանդես կգան։

«Կատարված փոփոխությունները ցանկացած ֆորսմաժորային իրավիճակում լուծում ունեն, հետևաբար կենտրոնանալ կոնկրետ ընտրության, գործընթացի վրա, կարիքը չկա։ Կարևորագույնն այն է, որ Արցախի նախագահի ինստիտուտի գործունեությունը շարունակվելու է»,- ասաց Մ. Հակոբյանը։

Նա ընդգծեց, որ Արցախի նախագահի ինստիտուտի կարևոր գործառույթն այն է, որ թույլ չտալ փակել Արցախի հարցը, գնալ արցախիցների իրավունքի իրացման հետևից, որն անում են պետական ինստիտուտները, նաև նախագահի ինստիտուտը։

«Մեր բոլոր գործողությունները, միգուցե երբեմն համեստ, երբեմն հասարակության համար անհասկանալի, բխում են Հայաստանի անվտանգությունից։ Մեզ համար որևէ տարբերություն չկա ՝ Արցախ, կամ Հայաստան, ի տարբերություն այս իշխանությունների, որոնք անընդհատ շահարկում են այս հարցը, մեզ համար երկու հայկական պետությունները գերագույն արժեք են։

Մեր գործողությունները, որոնք բխում են արցախցիների Արցախ վերադառնալու իրավունքից, որևէ այլ գործընթաց չենք իրականացնում։ Ստեղծելով նաև հանձնախումբ, որը ղեկավարում է Վարդան Օսկանյանը, փորձում ենք արցախիցների իրավունքի հարցը թույլ չտանք մարի միջազգային հարթակներում, առ այն պահը մինչև Հայաստանում կհաստատվեն ազգային իշխանություններ»,- ասաց Մ.Հակոբյանը՝ հավելելով. «Արցախցին չի ապրելու Ադրբեջանի անձնագրերով, այդ ընտրությունը արել ենք 2023-ի սեպտեմբերին»։

www.news.am

Լրահոս