Այսօր Բաքվում կշարունակվի Արցախի նախկին ղեկավարների դեմ շինծու մեղադրանքներով դատավարությունը

Այսօր Բաքվում կշարունակվի օկուպացված Արցախի նախկին ռազմաքաղաքական ղեկավարության և քաղաքացիական անձանց դեմ շինծու գործերով դատավարությունը: Նրանց մեղադրում են «ահաբեկչության», «ռազմական հանցագործությունների», «ցեղասպանության» և այլ «հանցանքների» համար: Այս մասին հայտնում են ադրբեջանական լրատվամիջոցները։

Ընդհանուր առմամբ, դատարանի առաջ կանգնելու է 15 հայ` Արցախի նախկին նախագահներ Արայիկ Հարությունյանը, Արկադի Ղուկասյանը, Բակո Սահակյանը, ԱԺ նախկին նախագահ Դավիթ Իշխանյանը, Պաշտպանության բանակի ԶՈւ շտաբի նախկին պետ Դավիթ Մանուկյանը, ԱԳ նախկին նախարար Դավիթ Բաբայանը,ՊԲ նախկին հրամանատար Լևոն Մնացականյանը, քաղաքացիական անձինք՝ Վասիլի Բեգլարյանը, Էրիկ Ղազարյանը, Դավիթ Ալավերդյանը, Գուրգեն Ստեփանյանը, Լևոն Բալայանը, Մադաթ Բաբայանը, Գարիկ Մարտիրոսյանը, Մելիքսեթ Փաշայանը:

Հիշեցնենք, որ Արցախի նախկին պետնախարար Ռուբեն Վարդանյանի «գործն» առանձին են քննում։ Ռուբեն Վարդանյանը հրաժարվել է պատասխանել դատավորի հարցերին՝ ի նշան իրեն առաջադրված շինծու մեղադրանքների դեմ բողոքի

Բաքվի զինվորական դատարանում, դատավոր Զեյնալ Աղաևի նախագահությամբ, այսօր շարունակվել է Ադրբեջանում ապօրինի պահվող Արցախի նախկին պետնախարար Ռուբեն Վարդանյանի շինծու գործերով հերթական դատական նիստը։ Ադրբեջանական լրատվամիջոցների հաղորդմամբ՝ նիստին մասնակցել են, իբր, տուժողների մի մասը, նրանց իրավահաջորդներն ու ներկայացուցիչները:

Նիստի սկզբում Ռուբեն Վարդանյանը և նրա պաշտպան Ավրաամ Բերմանը դատարանին խնդրել են պայմաններ ստեղծել հանդիպման համար։ Դատարանը բավարարել է միջնորդությունը և հայտարարել ընդմիջում, որից հետո Ռուբեն Վարդանյանն ու նրա պաշտպանը դատավորների կազմի ինքնաբացարկի միջնորդություն են ներկայացրել։

Մեղադրող դատախազներ Վուսալ Ալիևը և Ֆուադ Մուսաևը, որոնք պաշտպանում են պետական մեղադրանքը, միջնորդության վերաբերյալ նշել են, որ նախորդ դատական նիստում նույնաբովանդակ միջնորդություն է քննարկվել և համապատասխան որոշում է կայացվել։ Նշելով, որ միջնորդության մեջ բարձրացված հարցերի վերաբերյալ կոնկրետ հիմքեր չկան՝ դատախազները խնդրել են մերժել միջնորդությունը։

Այսօրվա նիստին շարունակվել է մեղադրական եզրակացության ընթերցումը։ Նշվել է, թե Հայաստանը Ռուբեն Վարդանյանի և մյուսների միջոցով զինել է Լեռնային Ղարաբաղին և նրա կողմից ստեղծված «ապօրինի զինված կազմավորումները Ադրբեջանի Հանրապետության ինքնիշխան տարածքներում» և ներկայացվել, թե որքան զենք ու զինամթերք է տրամադրվել։

Գլխավոր դատախազի ավագ օգնական Վուսալ Ալիևը հրապարակել է Քրեական օրենսգրքի համապատասխան հոդվածները, որոնցով մեղադրվում է Ռուբեն Վարդանյանը։

Ըստ այդմ, Ռուբեն Վարդանյանին մեղադրանք է առաջադրվել

100.1, 100.2 (հարձակողական պատերազմ ծրագրել, նախապատրաստել, սկսել և վարել),

107 (բնակչության տեղահանում և բռնի տեղափոխում),

109 (հալածանք),

110 (մարդկանց բռնի անհետացում),

112 (ազատազրկում, որը հակասում է միջազգային իրավունքին),

113 (խոշտանգում),

114.1 (վարձկանություն),

115.2 (պատերազմի օրենքների կամ սովորույթների խախտում),

116.0.1, 116.0.1, 1.6.1, 1.6.1, 1.6 6, 116.0.18 (միջազգային մարդասիրական իրավունքի խախտում զինված հակամարտության ժամանակ),

120.2.1, 120.2.3, 120.2.4, 120.2.7, 120.2.11, 120.2.12 (դիտավորյալ սպանություն),

29.120.2.1, 29.120.2.3, 29.120.2.2.2.2.2. 29,120.2.12 (դիտավորությամբ սպանության փորձ),

192.3.1 (ապօրինի ձեռնարկատիրություն),

214.2.1, 214.2.3, 214.2.4 (ահաբեկչություն),

214-1 (ահաբեկչության ֆինանսավորում),

218.1, 218.2 (հանցավոր կազմակերպության ստեղծում),

228.3 (հրազենի, դրանց բաղադրամասերի, զինամթերքի, պայթուցիկ նյութերի և սարքերի ապօրինի ձեռքբերում, փոխանցում, վաճառք, պահպանում, փոխադրում և կրում),

270-1.2, 270-1.4 (ավիացիայի անվտանգությանը վտանգ ներկայացնող գործողություններ),

278.1 (իշխանության բռնի զավթում կամ պահպանում, պետության սահմանադրական կառուցվածքի բռնի փոփոխություն),

279.1, 279.2, 279.3 (օրենքով չնախատեսված զինված կազմավորումների կամ խմբերի ստեղծում) և

318.2 (Ադրբեջանի Հանրապետության պետական սահմանի ապօրինի հատում) հոդվածներով։

Այսպիսով ավարտվել է գործով մեղադրական եզրակացության եզրափակիչ մասի հրապարակումը։ Նիստը նախագահող դատավոր Զեյնալ Աղաևը Ռուբեն Վարդանյանին բացատրել է իրեն առաջադրված յուրաքանչյուր մեղադրանքի էությունը, իրեն ենթադրյալ արարքների իրավական նկարագրությունը, այդ արարքների համար քրեական օրենքով նախատեսված պատիժը, ինչպես նաև իրավունքները։

Օրենքով սահմանված կարգով դատավորը հարցրել է՝ արդյո՞ք իրեն մեղավոր համարում է։ Ռուբեն Վարդանյանը հրաժարվել է պատասխանել հարցերին՝ ի նշան իրեն առաջադրված շինծու մեղադրանքների դեմ բողոքի։ Հաջորդ դատական նիստը նշանակվել է փետրվարի 25-ին։

www.azg.am