Բաքվում պահվող հայերի հարցը Նիկոլ Փաշինյանի համար գոյություն չունեցող հարց է, որովհետև այն խանգարում է իր հեքիաթին. Արմեն Աշոտյան

Ռազմագերիների հարցը Նիկոլ Փաշինյանի համար գոյություն չունեցող հարց է: Այդ հարցն իրեն խանգարում է, խանգարում է իր հեքիաթին, իր խաղաղության կեղծ դարաշրջանի քարոզչությանը, որովհետև ամեն անգամ, երբ մենք տեսնում ենք Բաքվի և Երևանի բանտերում, իրենց քաղաքական կարծիքի պայքարի ազատության համար բանտարկված մեր հայրենակիցներին, Նիկոլ Փաշինյանի հորինված խաղաղությունը փշրվում է հազարավոր բեկորների և այդ բեկորները որևէ կերպ աղերս չունեն իրենց կողմից մատուցվող հեքիաթային իրականության խոստումների հետ: Այս մասին լրագրողների հետ զրույցում ասել է ՀՀԿ փոխնախագահ Արմեն Աշոտյանը:

Նա, խոսելով ռազմագերիներին ազատելու իշխանության քայլերի մասին, ասել է, որ եթե նույնիսկ փորձում են և արդեն հինգ տարի է չի ստացվում, ապա պետք է հրաժարական տան, գային մարդիկ, որոնք ավելի լավ կանեն այդ քայլերը:

Հարցին՝ արդյո՞ք իշխանափոխությունից հետո Աշոտյանը հավանական է համարում ռազմագերիների ազատումը, նա պատասխանել է. «Միանշանակ, դրա մասին կասկած չկա: Ես ուզում եմ, որ իմ հայրենակիցները չվարակվեն Նիկոլի կողմից սրսկվող այս հոռետեսությամբ, թե իբր ոչինչ փոխել հնարավոր չէ։ Ամեն ինչ հնարավոր է փոխել: Ամեն ինչ չէ, որ հնարավոր է հետ բերել այս պահին, բայց կանխել Հայաստանի անկումն ու ջախջախումը՝ հնարավոր է», - նշել է ՀՀԿ փոխնախագահն ու հավելել, որ հնարավոր է նաև պատասխանատվության ենթարկել Ադրբեջանի ռեժիմին՝ մարդկության դեմ գործած ոճիրների, էթնիկ զտումների, ցեղասպանության համար:

«Հնարավոր է, պատասխանատվության կանչել դավաճաններին, որոնք բերել են այս պատերազմը: Նիկոլ Փաշինյանը հերթական ինքնախոստովանական ցուցմունքը տվեց, որ բերել է այս պատերազմը, իմանալով՝ ինչ է անել։ Եվ Աստվածաշնչում ասվում է՝ ների՛ր իրենց, Հա՛յր, որովհետև չգիտեն թե ինչ են անում: Այս դեպքում ես դիմում եմ Հորը, որ նա չների իրենց, որովհետև նրանք գիտեին, թե ինչ են անում: Ազատություն քաղբանտարկյալներին», - եզրափակել է նա:

Հիշեցնենք՝ ավելի վաղ տեղեկացրել էինք, որ ՀՀԿ փոխնախագահ Արմեն Աշոտյանը ԵՄ գրասենյակի առջև ակցիա է իրականացնում «Երևանում և Բաքվում պահվող հայ պատանդների, ռազմագերիների և քաղաքական բանտարկյալների ազատության» համար:

www.tert.am

Լրահոս