
06-02-2025 | 15:18
«Գեղանկարչի զենքը իր վրձինն է»․ ուսուցչի՝ քանդակագործ Արմեն Համբարձումյանի այս պատգամն ու խորհուրդը մինչ օրս ուղեկցում է գեղանկարիչ Արմեն Վանցյանին։
Նկարել սկսել է վաղ տարիքից, ապա ծնողների խորհրդրով ու ուղղորդմամբ ստացել է մասնագիտական կրթություն։ Հիմա նաև ինքն է դասավանդում իր արվեստանոցի սաներին․ դասավանդում է, միևնույն ժամանակ՝ նրանցից սովորում․ «Հրաշալի ճաշակ ունեն գույն դնելու․ ես նրանցից շատ բան եմ սովորում»,-նշում է գեղանկարիչն ու վստահեցնում՝ ստեղծագործելիս հաճախ է դուրս գալիս ակադեմիական շրջանակներում, որ ինքն իրեն կատարելագործի։
Արմեն Վանցյանի ստեղծագործում է տարբեր ուղղություններով, բայց խոստովանում է՝ հոգեհարազատ է իմպրեսիոնիզմը։ Ջրաներկ, յուղաներկ և այլ նյութեր․ գեղանկարիչը սիրում է տարբեր նյութերով աշխատել և դա պայմանավորում է նրանով, որ թեման ինքն է թելադրում՝ ինչ նյութով աշխատել։
Տարիների հեռվից գեղանկարիչը հիշում է՝ առաջին աշխատանքը վաճառել է ուսանող տարինիներին, որը պատվիրված դիմանկար էր, հիմա արդեն նրա աշխատանքներն ամենուր են՝ թանգարաններում, մասնավոր հավաքածուներում։ Սիրում է, երբ նկարների գնորդները արձագանքում են, որ իր աշխատանքն այդ տան մթնոլորտն է փոխել, այն լցրել արմենվանցյանական վառ գույներով։
Իր ստեղծագործական ճանապարհին Արմեն Վանցյանն հաճախ է հիշում իր ուսուցչին ու նրա խորհուրդները․ դրանցից մեկն է նաև այն, որ արվեստը պետք չէ ստեղծել վաճառելու նպատակով․ նախ պետք է արվեստ ստեղծել, որը կհետաքրքրի արվեստասերներին, ասելիք կունենա և դիտողի մոտ կարթնացնի գեղեցիկի զգացողությունը։
Արմեն Վանցյանը հաճախ է մասնակցում տեղական և միջազգային ցուհանդեսների, մրցույթների, ամեն անգամ՝ նորովի, քանի որ իրեն փորձում է ամենատարբեր ուղղություններում՝ ներկայացնելով իր ապրումներն ու զգացողությունները։
Այսօր էլ գեղանկարիչը ստեղծագործական բուռն ընթացքի մեջ է․ ստեղծվող յուրաքանչյուր աշխատանքում նա հոգի է դնում, որ արվեստասերն ամեն անգամ գեղեցիկը տեսնի, իսկ վրձինն իսկապես զենք դառնա՝ հայրենիքին արվեստով նվիրվելու գործում։
Նրա աշխատանքներին կարող եք ծանոթանալ www.oasisart.com մշակութային հարթակում՝ հետևյալ հղմամբ https://www.oasisart.com/hy/author/55/