Դոնալդ Թրամփը հայտնել է՝ ինչ պաշտոն կառաջարկի Իլոն Մասկին, եթե ինքը հաղթի նախագահական ընտրություններում

Նախագահի հանրապետական թեկնածու Դոնալդ Թրամփը լայնածավալ ելույթի ժամանակ, որտեղ ներկայացրել է երկրի տնտեսական տեսլականը, հայտարարել է, որ եթե նոյեմբերի 5-ի ընտրություններում ինքը հաղթի, իր միլիարդատեր աջակից Իլոն Մասկի գլխավորությամբ կստեղծի հանձնաժողով՝ կառավարության արդյունավետությունը բարելավելու համար, հայտնել է Reuters գործակալությունը։

ԱՄՆ նախկին նախագահն, ըստ իրազեկ աղբյուրների՝ իր օգնականների հետ մի քանի շաբաթ քննարկում էր կառավարության արդյունավետությունը բարելավելու նպատակով հանձնաժողով ստեղծելու գաղափարը։

Սակայն հինգշաբթի ելույթ ունենալով Նյու Յորքի տնտեսական ակումբում, նա առաջին անգամ հրապարակավ հավանություն է տվել այդ գաղափարին: Թրամփը միաժամանակ առաջին անգամ հայտարարել է, որ Մասկը համաձայնել է ղեկավարել նշված մարմինը։

Թրամփը չի հստակեցրել՝ ինչպես է աշխատելու նման հանձնաժողովը, բացի այն, որ հանձնաժողովը իր ստեղծման օրվանից վեց ամսվա ընթացքում «խարդախությունն ու ոչ պատշաճ վճարումները» վերացնելու ծրագիր կմշակի:

«Ես կստեղծեմ Կառավարության արդյունավետության հանձնաժողով, որի նպատակն է իրականացնել ամբողջ դաշնային կառավարության ֆինանսական և կատարողականի ամբողջական վերանայում և առաջարկել լայնածավալ բարեփոխումներ»,-ասել է Թրամփը:

Օգոստոսի 19-ին թվագրված փոդքաստում Մասկը հայտնել է, որ ինքն այս հարցի շուրջ խոսել է ԱՄՆ նախկին նախագահի հետ, և որ ինքը շահագրգռված կլինի աշխատել նշված գերատեսչությունում։

«Անհամբեր սպասում եմ Ամերիկային ծառայելու ընձեռված հնարավորությանը», - գրել է Մասկը X-ի իր միկրոբլոգում: «Ոչ աշխատավարձ, ոչ կոչում, ոչ մի ճանաչում չի պահանջվում»:

Լրահոս