ԵԽԽՎ ՆԱԽԱԳԱՀԸ ԲՌՆԱՊԵՏ Է ԱՆՎԱՆԵԼ ԱԼԻԵՒԻՆ. ԲԱՔՎՈՒՄ ՀԻՍՏԵՐԻԱ Է

Ադրբեջանի արտաքին գործերի նախարարությունը խստորեն մերժում և դատապարտում է Եվրոպայի խորհրդի խորհրդարանական վեհաժողովի (ԵԽԽՎ) նախագահ Թեոդորոս Ռուսոպուլոսի՝ Alpha News հեռուստաալիքին տված հարցազրույցում Ադրբեջանին ուղղված մեղադրանքները։

Այս մասին ասվում է արտաքին գործերի նախարարության մամուլի քարտուղար Այհան Հաջիզադեի մեկնաբանությունում, փոխանցում են այդ երկրի ԶԼՄ-ները:

«Հայտնի է, որ չնայած երկխոսության համար ադրբեջանական կողմի բաց լինելուն, նույնիսկ Եվրոպայի խորհրդի կանոնադրության խախտման և ԵԽԽՎ-ի լիազորությունները գերազանցելու հետևանքով Ադրբեջանի դեմ արված քայլից հետո Ռուսոպուլոսը, Շվաբեն և նրանց նման մի շարք այլ անձինք անընդհատ փորձում են ստվեր գցել մեր երկրի դիրքորոշման վրա՝ հիմնված միջազգային իրավունքի և արդարության վրա։

ԵԽԽՎ-ն վերջին տարիներին վաստակել է ադրբեջանական ժողովրդի արդարացի ատելությունը երկակի ստանդարտների վրա հիմնված իր հակաադրբեջանական քաղաքականության պատճառով։

Մեր երկրի ղեկավարին վիրավորելը և նրան «բռնապետ» անվանելը միանգամայն անընդունելի է և քաղաքական անգրագիտության և կուլտուրայի պակասի դրսեւորում է։

Վեհաժողովում տիրող հիստերիկ իրավիճակը և կառույցը գլխավորող բռնապետ Ռուսոպուլոսը ԵԽԽՎ-ում ողբալի վիճակի դրսեւորում են։ Նույն իրավիճակն է ստեղծվել Եվրախորհրդարանում։

Ինչ վերաբերում է Մարդու իրավունքների եվրոպական դատարանի որոշումների վերաբերյալ մեր դիրքորոշմանը, ապա անհեթեթ է Ադրբեջանից պահանջել դատարանի կայացրած որոշումների կատարումը, հաշվի առնելով, որ Ադրբեջանը չի մասնակցել դատավորների ընտրությանը։ Նման պայմաններում դատական որոշումների կատարումն անհնար է։

Նշենք, որ Թեոդորոս Ռուսոպուլոսի անունը ԵԽԽՎ 76 անդամների հետ ընդգրկվել է սև ցուցակում, ովքեր պաշտպանել են ԵԽԽՎ-ում ադրբեջանական պատվիրակության լիազորությունները կասեցնելու անարդար և իրավաբանորեն կասկածելի նախաձեռնությունը։

«Եթե Ռուսոպուլոսը մտնի Ադրբեջան, նրա մուտքը կմերժվի»,- ասել է ԱԳՆ ներկայացուցիչը։

www.hraparak.am

Լրահոս