ԵՄ-ը պատրաստ չէ Ուկրաինայի հարցում գործել առանց ԱՄՆ-ի. Euractiv

Մի քանի եվրոպացի առաջնորդներ, չնայած Ուկրաինային աջակցելու խոստմանը, Կիեւին հասկացրել են, որ նախընտրում են տեսնել, որ նա վերականգնի հարաբերությունները Վաշինգտոնի հետ, քան առաջ շարժվի առանց Միացյալ Նահանգների: Այս մասին գրել է Euractiv պորտալը։

ԵՄ առաջնորդները համաձայնել են, որ «կարեւոր է շարունակել սերտորեն աշխատել Միացյալ Նահանգների հետ, մասնավորապես ՆԱՏՕ համատեքստում», եւ որ «անվտանգության լրացուցիչ երաշխիքների համար ապագա եվրոպական ներդրումները պետք է մշակվեն Միացյալ Նահանգների հետ ձեռք ձեռքի տված»,- պորտալը մեջբերել է միության պաշտոնական ներկայացուցչի խոսքերը բանակցություններից հետո: Մարտի 2-ին Լոնդոնում ուկրաինական կարգավորման հարցով հանդիպում է կայացել։ Հավաքվել էին Գերմանիայի, Դանիայի, Իսպանիայի, Իտալիայի, Կանադայի, Նիդեռլանդների, Նորվեգիայի, Լեհաստանի, Ռումինիայի, Ֆինլանդիայի, Ֆրանսիայի, Չեխիայի եւ Շվեդիայի ղեկավարները։ Ներկա էին նաեւ Եվրահանձնաժողովի նախագահ Ուրսուլա ֆոն դեր Լյայենը, Եվրոպական խորհրդի նախագահ Անտոնիու Կոշտան եւ ՆԱՏՕ գլխավոր քարտուղար Մարկ Ռյութեն:

Ինչպես նշել է պորտալը, Կիեւի եվրոպացի դաշնակիցները չունեն հստակ առաջնորդ, որը գլխավորեր ջանքերն Ուկրաինայի կարգավորման ուղղությամբ, եւ ԵՄ-ը չի ցանկանում գնալ այդ ուղղությամբ առանց Միացյալ Նահանգների: Euractiv-ը նշել է, որ Փարիզում եվրոպացի առաջնորդների նախորդ երկու հանդիպումները չեն հանգեցրել կարգավորման կոնկրետ ծրագրերի մշակման։

www.news.am

Լրահոս