«Ընտրություններին երկու օրակարգ է լինելու». Ի՞նչ պետք է անեն քաղաքական ուժերը, ըստ Կարեն Քոչարյանի

Ընդդիմության դաշտում նոր հայտ ներկայացրած ուժերը դեռեւս չեն հայտարարել քաղաքական քայլերի մասին, բոլորը դեռ հասարակական հիմունքներով են մտել դաշտ, խոսքը «Մեր ձևով»–ի մասին է, «Միասնության թևերի» մասին է, էլի նոր ինչ–որ ուժեր կան երիտասարդական։ Այս մասին NEWS.am–ի հետ զրույցում նշեց քաղտեխնոլոգ Կարեն Քոչարյանը։

«Այս ֆոնի վրա բավականին պասիվ են ավանդական քաղաքական ուժերը, այդ թվում նաև խորհրդարանական ուժերը։ Ժամանակը ցույց կտա՝ ինչ են ուզում անել։ Ես կարծում եմ այնուամենայնիվ նրանք չեն միավորվելու մեկ ուժի ներքո, այսինքն մեկ դաշինքով չեն հանդես գալու։ Ավելին բավականին շատ են լինելու մասնակիցները։ Խնդիրն այն է, որ ցանկացած ընդդիմադիր ուժ, որն իրոք ընդդիմադիր է և իրոք իրոք փոփոխություն է ուզում, ընտրություններից առաջ ճիշտ հաշվարկի իր ուժերը, որովհետև եթե գնա առանձին և չհավաքի անհրաժեշտ 4 կամ 8 տոկոսները, դա իշխանության օգտին է լինելու։ Դա լինելու է փոշիացում։ Ես ինքս, որպես մարտավարություն, կողմ եմ, որ չգնան բոլորը նույն բանով, թող գնան շատ տարբեր թևերով՝ ռացիոնալ, օպտիմալ քանակի թևերով: Դա կլինի երևի հինգ-վեց թև: Այստեղ խնդիրն այն չէ, թե ովքեր լինեն, այլ այն, որ չփոշիացնեն ձայները։ Իսկ եթե անցնեն ու հետո միավորվելով հաղթեն իշխանությանը, դա ճիշտ կլինի։ Այդ որոշումները պետք է կայացվեն մայիսին»,–ասաց նա։

Կարեն Քոչարյանը նկատեց, որ հայաստանյան քաղաքական դաշտում ամենացավոտ թեման ամբիցիաներն են. «Հայաստանի պայմաններում շատ քչերին է տրված լինել քաղաքական դաշտում ու չունենալ ամբիցիա։ Արդեն 30 տարի է, ես տեսնում եմ, որ բոլորը ընտրություններից առաջ քեզ համոզում են, որ տես, հեսա ինչ եմ անելու, իսկ հետո «կռուտիտը» գտնում են, թե ինչու այդպես չեղավ։ Ցավոք, հետո չեն ընդունում, չեն վերլուծում, թե ինչու այսպես եղավ»։

Քաղտեխնոլոգը նկատեց, որ 2018–ից հետո Նիկոլ Փաշինյանը մնացել է ընդդիմադիր լրագրող, լավագույն դեպքում ընդդիմադիր պատգամավոր, իսկ նախկին իշխանություններն էլ մնացել որ որպես իշխանություն, իրենց մեջ այդ առումով բան չփոխվեց. «Սովորաբար իշխանությունը իր քաղաքական գործողություններում ամեն ինչ փորձում է հաշվարկել, այսինքն, ռիսկը տանում է զրոյականի։ Իսկ ընդդիմությունը միշտ ավելի ռիսկային է, չի հաշվարկում շատ բաներ, ավելի այն էնտուզիազմի, էմոցիաների, հա, պահի տակ է գործում։ Այսօրվա մեր ընդդիմությունը գործում է որպես իշխանություն, ինքը մինչև վերջ եթե չհաշվարկի, թե սա ինչ ռիսկեր կարա պարունակի, ինքը չի գնում որևէ գործողության»։

Հարցին՝ այս ընտրությունը ինչի՞ մասին է լինելու, ո՞ր օրակարգով, ո՞ր գաղափարը կաշխատի, քաղտեխնոլոգը պատասխանեց. «Իմ կարծիքով, ընտրություններին երկու օրակարգ է լինելու՝ անվտանգություն և սոցիալ-տնտեսական կենցաղային խնդիրներ։ Ես չունեմ լայն, լուրջ սոցիալական ուսումնասիրություն, պարզապես շփվելով տարբեր խավերի հետ, տարբեր տեղերում, թե Երևանում, թե մարզերում, ստացել եմ այդ տպավորությունը։

Ընտրությունների գնացող քաղաքական ուժերը պետք է առավելագույնս փորձեն շփվել հասարակության հետ և փորձեն անմիջական շփումների ժամանակ մարդկանց շատ ուղիղ հարցնեն, իսկ ի՞նչն է իրենց հետաքրքրում։ Դա առավելագույն հստակ սոցիոլոգիական հարցում է լինելու իրենց համար, ստանան պատասխանները ու այդ պատասխանների վրա կառուցեն արդեն իրենց ծրագրերը։

Եթե չլինեն նոր մտքեր, ապա Նիկոլ Փաշինյանի՝ իբր խաղաղություն բերելու օրակարգով էլ բոլորը կգնան ընտրության»։