Երբ կտավը նույնացնում է մարդուն ու արվեստագետին. Արա Հակոբյանի անհատական ցուցահանդեսը՝ Թեքեյան կենտրոնում

Ներշնչանքի աղբյուր՝ կնոջից, ծաղիկներից մինչև հոգևոր թեմաներ, որոնք հատկապես վերջին տարիների ծանր իրավիճակներին գեղանկարչին ստիպել են ավելի մոտենալ Աստծուն ու արարչագործությանը։
Թեքեյան կենտրոնի ցուցասրահում բացվել է գեղանկարիչ, արվեստագիտության դոկտոր, պորֆեսոր, Հայաստանի Թեքեյան մշակութային միության անդամ Արա Հակոբյանի անհատական ցուցահանդեսը։
Արա Հակոբյանը 30 աշխատանք է ընտրել այս ցուցահանդեսի համար՝ տարբեր տարիների գործեր, որոնց մեջ առանձնանում է հոր՝ արվեստագիտության դոկտոր Հրավարդ Հակոբյանի դիմանկարը։ Հայրը, պարզվում է, որդու ամենախիստ քննադատն է։
Անաչառ արվեստաբան հոր անկողմնակալ աչքը ստիպել է որդուն կատարելագործել ու լավագույնս մատուցել այն հուզական աշխարհը, որին այսօր հաղորդակից են դառնում արվեստասերները, ոլորտի վարպետները։
Սա Արա Հակոբյանի 6-րդ անհատական ցուցահանդեսն է. 10 տարվա ընդմիջումից հետո վերջին տարիների ստեղծագործությունները ներկայացնելու հնարավորությունը Թեքեյան միությունն է ստեղծել։
Հայաստանի Թեքեյան միության նախագահ Ռուբեն Միրզախանյանն Արա Հակոբյանի ստեղծագործական ներշնչանքների ականատեսն ու վկան է եղել։ Անձրևն անգամ կարող է անչափ ոգևորել գեղանկարչին ու բերկրանք պատճառել։
Արա Հակոբյանին ճանաչում և գնահատում են տարբեր ոլորտներում։ Եվ շատերը նրա մարդ և արվեստագետ տեսակներն ընկալում են որպես մեկ ամբողջություն։
Արա Հակոբյանը ոչ միայն գեղանկարիչ-արվեստաբան է, այլև ղեկավարում է Խաչատուր Աբովյանի անվան հայկական պետական մանկավարժական համալսարանի գեղարվեստական կրթության ֆակուլտետը։
Նրա անհատական ցուցահանդեսը Թեքեյան կենտրոնի ցուցասրահում բաց է մինչև մայիսի 19-ը։ Հողորդակցվեք գեղանկարչի հույզերի գունապնակին։