Էրդողանը հայտարարել է, որ Կիպրոսի թուրքական օկուպացիան «կտևի դարեր»

Թուրքիայի նախագահ Ռեջեփ Թայիփ Էրդողանը շաբաթ օրը հաստատել է իր երկրի քաղաքական և ռազմական հանձնառությունը Թուրքիայի կողմից օկուպացված Հյուսիսային Կիպրոսի նկատմամբ՝ Կիպրոսի բաժանված մայրաքաղաք Նիկոսիայի հյուսիսային մասում TEKNOFEST-ի մրցանակաբաշխության արարողության ժամանակ, տեղեկացնում է Kathimerini-ն։

Էրդողանը հայտարարել է, որ Թուրքիան և կիպրոսի թուրքերը Հյուսիսային Կիպրոսի «օրինական տերերն» են, և խոստացել է, որ կղզում նրանց ներկայությունը կշարունակվի «դարերով»։

«Սա պարզապես տոն չէ, - ասել է նա։ - Սա վճռորոշ քայլ է դեպի մեկ ազգի, միասնական սրտով երկու պետությունների ընդհանուր ապագան։ Նա, ով չգիտի, պետք է դա յուրացնի։ Նա, ով դա չի լսել, պետք է լսի»։

Էրդողանն ընդգծել է Թուրքիայի աճող պաշտպանական ներուժը՝ նշելով այնպիսի համակարգեր, ինչպիսիք են «Bayraktar Kizilelma» և «Anka-3» անօդաչու թռչող սարքերը, «KAAN» կործանիչները, «Hurjet» և «Hurkus» ինքնաթիռները, «Atak-2» ուղղաթիռը և TCG Anadolu դեսանտային նավը։

«Այժմ մենք մտնում ենք առաջատար եռյակի մեջ մարտական անօդաչու թռչող սարքերի արտադրությամբ։ Ձեր վստահության շնորհիվ մենք կկառուցենք ավելի ուժեղ Թուրքիա և ավելի բարգավաճ Հյուսիսային Կիպրոս», - ասել է նա՝ նկատի ունենալով հունական Կիպրոսի օկուպացված հյուսիսային մասը։

Նա նաև հայտարարել է տարածաշրջանը Թուրքիայի էներգահամակարգին միացնելու ծրագրերի մասին՝ ստորջրյա ջրատարի կառուցման ավելի վաղ նախագծին համապատասխան։ Կիպրոսը բաժանվել է 1974 թվականին, երբ Թուրքիան ներխուժեց նրա տարածք՝ Հունաստանի կողմից աջակցվող պետական հեղաշրջումից հետո։

Միայն Թուրքիան է ճանաչում կիպրոսի թուրքերի անկախության հռչակագիրը կղզու հյուսիսային մասում, որտեղ նա պահում է ավելի քան 35․000 զինծառայող։

www.news.am

Լրահոս