Երևանի ավագանու՝ երեկ ծեծկռտուքով ընդմիջված նիստն այսօր շարունակվում է

Բռնությունը մեզ համար մերժելի է և անընդունելի՝ լինի ֆիզիկական բռնություն, թե խոսքով. ավագանու այսօրվա նիստն սկսեց Տիգրան Ավինյանը։

Նա նկատի ուներ երեկվա ավագանու նիստին տեղի ունեցած վիճաբանություն-ծեծկռտուքը, որը շարունակվել է նաև քաղաքապետարանի միջանցքներում։

Երեկ «Հանրապետություն» խմբակցությունից Անի Խաչատրյանը «Մայր Հայաստան» դաշինքից Սոնա Աղեկյանին անվանել է «կոյուղաջրերի թագուհի», ինչին հաջորդել է քաշքշոցն ու տուրուդմփոցը։

Տիգրան Ավինյանն այսօր զգուշացում տվեց երեկվա ծեծկռտուքի մասնակիցներ Անի Խաչատրյանին, Սոնա Աղեկյանին և Նարինե Հայրապետյանին։

Երեկ ծեծկռտուքով ընդմիջված ավագանու նիստը շարունակվեց այսօր։ Առաջինը ելույթ ունեցավ «Մայր Հայաստան» դաշինքից Մեսրոպ Մանուկյանը։ Ըստ երեկ տարածված տեսանյութերի՝ հենց նրա վրա է եղել հարձակումը։

Մեսրոպ Մանուկյանն ասաց, որ հետևողական է լինելու, որպեսզի իրավական ուժով բոլորը պատժվեն, այդ թվում՝ Երևանի վարչական շրջանների այն ղեկավարները, որոնք իրենց պահել են «վերջին խուժանի պես»։

Լրահոս