ԵՌԱՏՈՆԻ ՕՐԸ ԿԱՐՈՂ ԷԻՐ ՄԵԶ ԽՆԱՅԵԼ․ ՔՈ ՍԻՐԵԼԻ ԱԴՐԲԵՋԱՆՑԻ ԽԱՂԸՆԿԵՐԸ 2020-ԻՆ ԱՌԱՋԻՆԸ ԵՐԳԵՑ ՇՈՒՇԻՈՒՄ․ ՀԱՍՄԻԿ ՊԱՊՅԱՆ

Հայաստանի ժողովրդական արտիստ, օպերային երգչուհի Հասմիկ Պապյանը բաց նամակ է հղել երիտասարդ երգչուհի Ջուլիանա Գրիգորյանին, որը մայիսյան եռատոնի օրը լուսանկարվել ու մեծարանքի խոսքեր է հղել ադրբեջանցու, որն ներկայացման մեջ իր զուգընկերն է եղել։

Հասմիկ Պապյանի բաց նամակում ասվում է․

«Բաց նամակ երիտասարդ երգչուհի, միջազգային մրցույթների դափնեկիր, դեպի համաշխարհային մեծ բեմեր ճամփա բռնած Ջուլիանա Գրիգորյանին։

Սիրելի Ջուլիանա, ավելորդ է ասել, թե հայ ժողովուրդը, այդ թվում նաև ես, որքան հպարտ ենք քո շարունակական հաջողություններով։ Երեք շաբաթ շարունակ, քո էջում տեղադրում ես «Մուսկատ» թագավորական օպերայում տեղի ունեցած «Տրավիատա» ներկայացման առաջնախաղի մասին, որտեղ քո զուգընկերն էր «հարևան» երկրի հայտնի տենորը։

Իհարկե, խնդիր չկա, կարող ես նրան սիրել, հավանել որպես երգիչ, հիանալ, անվանել «ֆանտաստիկ»։

Ամեն դեպքում, Մայիսի 9-ին՝ ոչ վաղ անցյալում մեր փառապանծ Եռատոնի Օրը, կարող էիր մեզ խնայել…

Տեղեկացնեմ քեզ, որ 2020-ի դեկտեմբերին քո սիրելի խաղընկերը, մշակույթի նախարարի հետ առաջինը երգեց Շուշիում, որպես հայերին հաղթած ժողովրդի արժանավոր զավակ։ Նաև ուզում եմ հիշեցնել, որ 2020-ի հունվարին, (44-օրյա պատերազմից առաջ), նա Դրեզդենում հրաժարվեց զուգերգ կատարել հայազգի Ռուզան Մանթաշյանի հետ, միայն վերջինիս ազգային պատկանելության պատճառով։ Իհարկե գերմանացիները նրան «դարձի բերեցին» և Ռուզանը վերադարձավ ու միայնակ երգեց «Օպերային պարահանդեսին»։

Հետաքրքիր է իմանալ, արդյո՞ք քո խաղընկերը միևնույն ջանասիրությամբ և հրճվանքով իր էջերում լուսաբանում է հայ երգչուհու հետ ունեցած իր ելույթների մասին։ Վստահ չեմ…

Կարիերան, հաջողությունները կանցնեն, կգնան, հայ լինելը և հայ մնալը՝ ոչ…»

www.hraparak.am

Լրահոս