Գիշերվա ժամը 3։15-ին դիրիժոր Սերգեյ Սմբատյանին 2 ամսով կալանավորելու վճիռ կայացվեց

Հուլիսի 29-ին արտակարգ և լիազոր դեսպան Սերգեյ Սմբատյանն ու նրա որդին՝ Հայաստանի պետական սիմֆոնիկ նվագախմբի գեղարվեստական ղեկավար և գլխավոր դիրիժոր Սերգեյ Սմբատյանը հրավիրվել են Ոստիկանություն։

Նրանք ձերբակալվել են։

Հուլիսի 29-ի՝ ժամը 22։00-ից, Երևանի Կենտրոն և Նորք-Մարաշ համայնքների ընդհանուր իրավասության դատարանում տեղի են ունեցել Արմեն Սմբատյանի և Սերգեյ Սմբատյանի գործերով դատական նիստերը։

Ինչո՞ւ է դատական նսիտը տեղի ունենում բառացիորեն գիշերով՝ այն էլ շաբաթ երեկոյան լույս կիրակիի գիշերը, հայտնի չէ։

Օրվա ընթացքում դատախազությունը հաղորդագրություն էր հրապարակել, ըստ որի՝ քրեական վարույթով պարզվել է, որ արտակարգ և լիազոր դեսպան ԱրմենՍմբատյանը, վերջինիս որդի, դիրիժոր Սերգեյ Սմբատյանը և գործարար Ա.Պ.-ն 2012 թվականին Հայաստանի Հանրապետության կառավարությանը ներկայացրել են 800 մլն դրամ արժողության «Գրքի աշխարհ» բազմաֆունկցիոնալ համալիր կառուցելու կեղծ ներդրումային ծրագիր և խարդախությամբ հափշտակել «Երևանի Պ.Չայկովսկու անվան միջնակարգ երաժշտական դպրոց» ՊՈԱԿ-ին անհատույց օգտագործման իրավունքով տրամադրված, Երևանի Կողբացի 36 հասցեում գտնվող հողամասից առանձնացված 300 քմ մակերեսով, 166 մլն 103 հազար դրամ արժողությամբ հողամասը:

Հայաստանի պետական սիմֆոնիկ նվագախմբի համերգաշրջանն ավարտվել է, երաժիշտներն արձակուրդում են։ Նրանք  դատախազության հաղորդագրությունից են տեղեկացել կատարվածի մասին ու ժամը 22։00-ից դատարանի առջև կանգնած սպասում էին դատական նիստի ավարտին։ Գիշերվա ժամը 3-ն էր, դատական նիստը դեռ ընթանում էր, իսկ դրսում սպասում էր նվագախմբի անձնակազմը։

Բոլորը մտահոգված էին՝ ի՞նչ վճիռ է կայացնելու դատավորը Սերգեյ Սմբատյանի համար։ Ինչո՞ւ է դատական նիստն ընթանում այսքան հապճեպ՝ գիշերով։

Բոլորը տարակուսած էին, անորոշության զգացումով, ապշահար։ Ոչ ոք չցանկացավ խոսել, կարծիք հայտնել։ Ժամը 3։15-ի սահմաններում դատավորը հրապարակեց վճիռը՝ դիրիժոր Սերգեյ Սմբատյանին 2 ամսով կալանավորել։

Հայաստանի պետական սիմֆոնիկ նվագախումբն օրերս է ավարտել համերգաշրջանը։ Վերջին համերգներից մեկն էլ տեղի ունեցավ Վանաձորում, որի ընթացքում, ինչպես հայտնի է, մի երիտասարդ հանկարծ բեմ բարձրացավ ու պարզեց Արցախի Հանրապետության դրոշը։ Դրանից հետո երիտասարդը ձերբակալվեց։

Գուցե այս հանգամա՞նքն էր պատճառը, որ 2012 թվականին տեղի ունեցած գործարքի մասին դատաիրավական համակարգում որոշել են հենց այս օրերին  հիշել ու ձերբակալել Սերգեյ Սմբատյանին։ Իսկ միգուցե մյուս պատճառն է՞լ է կապված Արցախի հետ։ Հուլիսի 4-ին Սերգեյ Սմբատյանն ու նրա ղեկավարած նվագախումբը միացել էին  Առողջապահության նախկին նախարար Արա Բաբլոյանի «Արցախի մարդասիրական աջակցություն» նախաձեռնությանը և «Արամ Խաչատրյան» համերգասրահում տեղի ունեցած համերգի հասույթը փոխանցեցին Արցախի աջակցման ծրագրին։

2012 թվականի կոմպրոմատներն ասպարեզ հանելու իսկական ժամանակը հենց հիմա՞ էր՝ Արցախի համար ծայրահեղ օրհասական այս ժամանակներում, ու հատկապես որ Արցախի դրոշը բեմում ծածանվեց հենց Սերգեյ Սմբատյանի համերգի ժամանակ, ու Սերգեյ Սմբատյանը հուլիսի 4-ին բարեգործական համերգով հանդես եկավ՝ ի պաշտպանություն Արցախի ու արցախահայության։

Ի դեպ, օգոստոսի 25-ին նախատեսված է Հայաստանի պետական սիմֆոնիկ նավագախմբի հերթական համերգը՝ «Սիմֆոնիկ Հայկո» խորագրով, սեպտեմբերին ծրագրված են համերգներ արտերկրում։