Գուցե դիզվառելիքի կամ ռազմամթերքի ապօրինի վաճառք է եղել, պետական դավաճանություն, իսկ գուցե թմրամիջոցների ապօրինի շրջանառություն. 15 զինվորների սպանության վարկածները

Հայաստանի Հանրապետությունը ոչինչ չարեց, որ ծնողների կասկածները փարատվեն, Փաշինյանի հետ հանդիպումից հետո ծնողների հիասթափությունը մեծ է եղել, իսկ վարույթ իրականացնող մարմնի նկատմամբ վստահություն չկա. Ազատ գյուղի զինվորական կացարանի ողբերգական դեպքի առնչությամբ  այսօր ասաց փաստաբան Նորայր Նորիկյանը։

Կապիտանի ցուցմունք տալու գործընթացը ավարտված է, առերեսումներ են եղել ոչ միայն նրա, այլև մյուս մեղադրյալների հետ։ Առաջիկայում էլի կլինեն մեղադրյալներ։ Կան պաշտոնյաներ, որոնք դուրս են մնացել քրեական պատասխանատվության գործընթացից։

Ողջ մնացած  զինծառայողների ցուցմունքների միջև ընդհանրություն չկա, հակասությունների կծիկ է, նրանց պատմածները չեն համապատասխանում անգամ ժամային առումով. հայտնել է փաստաբան Նորայր Նորիկյանը։

Դատաբժշկական նոր փորձաքնությունների արդյունքները, ըստ փաստաբանի, հայտնի կլինեն հուլիսին, ու նախաքննությունն այդպիսով կավարտվի։ Ապրիլի 27-ին և հունիսի 28-ին Ազատ գյուղի զինվորական կացարանում սպանված 15 զինծառայողների ծնողների և Նիկոլ Փաշինյանի միջև փակ հանդիպումներ են տեղի ունեցել։ Պայմանը եղել է, որ փաստաբան Նորիկյանը չպետք է մասնակցի այդ հանդիպումներին, այդ պատճառով էլ նա դրանց մասին տեղեկություններ հայտնել չի կարող։

«Տուժողների մոտ խորացել է տպավորությունը, որ վարույթ իրականացնող մարմինն այդպես էլ խորամուխ չեղավ դեպքի առնչությամբ այլ վարկածների ուսումնասիրմանը։ Այդ պատճառով էլ ծնողները կասկածում են՝ թշնամու կողմից դիվերսիա՞ է եղել, թե դիտավորյալ սպանություն՝ կապված դիզվառելիքի առևտրի, ռազմամթերքի հնարավոր վաճառքի, պետական դավաճանության, հակառակորդի հետ գաղտնի հաղորդակցության, թմրամիջոցների ապօրինի շրջանառության հետ»,- նշում է տուժողների փաստաբան Նորայր Նորիկյանը։

Վարույթ իրականացնող մարմինը հակված է պաշտոնական վարկածը բյուրեղացնել և այն ներկայացնել որպես բացարձակ ճշմարտություն։

Ներքին գործերի նախարարությունից հավաստիացրել են, թե դեպքի վայրում որևէ տեսա-լուսանկարահանում չի կատարվել, սակայն փրկարար ծառայությունը ներկայացրել է լուսանկարներ՝ դեպքի վայրից, բայց այն, ինչ հարմար է եղել իրենց, այնպիսի լուսանկարներ, որոնք ամբողջական պատկերացում չեն տալիս իրողության վերաբերյալ, այսինքն՝ փաստաբանին տրամադրվել են որոշ լուսանկարներ միայն։

Բացառված է, որ այսքանը լուսանկարեին, իսկ նախորդող իրավիճակը՝ չտեսանկարահանեին. վստահ է փաստաբան Նորիկյանը։

Նա և ծնողները բազմաթիվ հարցեր ունի՝ ուղղված Փաշինյանին, որը հունվարի 19-ին՝ դեպքից ժամեր անց, հայտարարեց, թե զինվորական կացարանում հրդեհը բռնկվել է անփութության հետևանքով՝ կրակի վրա բենզին լցնելու պատճառով։