«Հաղթելու ենք» կարգախոսը «օդից ընկած» լինելու մասին գրառումը փորձ է մաքրել Փաշինյանին և ցույց է տալիս պատերազմը կառավարելու որակը. Բադալյան

ԱԺ նախագահ Ալեն Սիմոնյանի գրառումից ստացվում է մի վիճակ, որ Հայաստանը պատերազմական տեղեկատվական քաղաքականությունը կառուցել է ինչ-որ օդից ընկած կարգախոսով։ Aysor.am-ի հետ զրույցում այս մասին ասաց քաղաքական վերլուծաբան Հակոբ Բադալյանը՝ անդրադառնալով Սիմոնյանի այն գրառմանը, թե Նիկոլ Փաշինյանը դեմ է եղել «Հաղթելու ենք» կարգախոսին և տեղյակ էլ չեն եղել, թե ով է դրել այն շրջանառության մեջ։

Բադալյանի կարծիքով՝ նախ գրառման իմաստը, թերևս, Նիկոլ Փաշինյանին որոշ չափով արդարացնելն էր։
«Սա կամ պարզապես Փաշինյանին մաքրելու փորձ է՝ անգամ այս գնով, կամ էլ, եթե իսկապես հեղինակը պետությունը չէ և այդ կարգախոսը հեղինակ չունի, դա առնվազն առաջացնում է հարցեր»,- նշեց նա՝ հավելելով, որ այդ իմաստով փորձ է արվել թուլացնել Փաշինյանին ուղղված հարցադրումները։

Միաժամանակ, ըստ վերլուծաբանի, ինքնին հարց է առաջանում՝ ո՞վ է ընտրել այդ կարգախոսը և ինչպե՞ս է ստացվել, որ այն դարձել է այսպես կոչված պաշտոնական քարոզչության ուղեկից։

«Այսինքն, եթե դա օդից ընկած կարգախոս է, արդեն իսկ խնդիր է առաջացնում։ Պարզվում է՝ պատերազմի մեջ գտնվող պետության տեղեկատվական քաղաքականության կարգախոսը օդից ընկած է։ Սա առավել քան խոսում է այն մասին, թե ինչպիսի որակով և մակարդակով կարող էր կառավարվել այդ պատերազմը»,– ասաց Հակոբ Բադալյանը։

www.aysor.am

Լրահոս