Հանրապետության օր. Ազատության Վերածնունդը Հայկական Հողում

Այսօր մայիսի 28-ն է՝ Հանրապետության օրը, երբ 1918 թվականին՝ աշխարհի պատերազմներից հյուծված ժամանակահատվածում վերածնվեց Հայոց պետականությունը։

Այսօր՝ ավելի քան մեկ դար անց, Հանրապետության օրը նշվում է այլ իրականության մեջ։ Մենք ունենք պետականություն, բայց չունենք ամբողջական խաղաղություն։ Վտանգված են երկրի սահմանների անձռնմխելիությունը , Սահմանադրությունը, ազգի ինքնությունը։

Հանրապետության օրը հիշեցնում է մեզ, որ պետականությունը չի չափվում տոներով ու գույներով։ Այն չափվում է արդարությամբ, խղճով, սերունդների հույսով։

Մայիսի 28-ը ազդարարում է՝ անկախությունը նվեր չէ, այլ նվաճում։
Այն վաստակել է մեր անցյալի տառապանքը, ներկայի հավատը և ապագայի սպասումը։ Պարտավոր ենք արժանի լինել օրվա խորհրդին՝ ամրապնդել պետականությունը նույն հավատով, որով այն ծնունդ առավ Սարդարապատի ճակատամարտում։

Սիրելի հայրենակիցներ,

Թեքեյան Մշակութային Միությունը սրտանց շնորհավորում է Հանրապետության անկախության օրվա՝ մայիսի 28-ի առթիվ, ի սրտե մաղթում խաղաղություն, բարօրություն մեր երկրին ու ժողովրդին։