Հայաստան-ԵՄ հարաբերությունները տարբեր ուղղություններով զարգացնելու ջանքերն արդյունքներ են տալիս. Վասիլիս Մարագոս

Հայաստանի և ԵՄ-ի միջև հարաբերությունները տարբեր ուղղություններով զարգացնելու ջանքերը տալիս են իրենց արդյունքները։

Այս մասին Հայաստանում ԵՄ պատվիրակության ղեկավար, արտակարգ և լիազոր դեսպան Վասիլիս Մարագոսը հայտարարեց Երևանում կայացած «Խաղաղության խաչմերուկ. միավորելով անվտանգությունն ու ժողովրդավարությունը» խորագրով համաժողովում:

«Եվրոպական խորհրդից ստացել ենք կոնկրետ առաջադրանք, որպեսզի զարգացնենք Հայաստանի և ԵՄ-ի միջև հարաբերությունները տարբեր ուղղություններով: Դրանից հետո ԵՄ-ն և Հայաստանն անխոնջ աշխատում են, բացահայտում են նոր հնարավորություններ, որպեսզի սա կյանքի կոչվի: Հպարտությամբ պետք է նշեմ, որ համատեղ ջանքերը տալիս են արդյունքներ: Ինչո՞ւ: Որովհետև կա համատեղ քաղաքական հանձնառություն և կա կոնկրետ կենտրոնացում երկու կողմերից: Ինչպես նաև կա համատեղ հանձնառություն մեր ընդհանուր արժեքներին՝ մարդու իրավունքներին, ժողովրդավարությանը, իրավունքի գերակայությանը: Եվրոպական Միությունն աջակցել և շարունակում է աջակցել Հայաստանին մի շարք ուղղություններով՝ տնտեսական, դատաիրավական բարեփոխումների: Փոխկապվածությունը, անկախությունը, տարածաշրջանային կապերը և խաղաղությունը սրա մի մասն են նաև»,- նշեց Վասիլիս Մարագոսը:

Ներկայում, ըստ Մարագոսի, գործընկերության ծրագրի շուրջ բանակցություններում բավականին առաջխաղացում կա:

Եվրամիությունը ողջունել է Հայաստանի կառավարության ներկայացրած «Խաղաղության խաչմերուկ» նախագիծը և Հայաստանում ու տարածաշրջանում իր գործընկերների հետ ակտիվորեն աշխատում է այն կյանքի կոչելու ուղղությամբ:

«Անմիջապես կուզենայի ընդգծել, որ գործընկերության խորհրդի նիստում, որին նաև ներկա է գտնվել նախարար Միրզոյանը (խմբ- ՀՀ ԱԳ նախարար Արարատ Միրզոյանը), ողջունվել է այս նախաձեռնությունը, որի նպատակն է խաղաղություն և նորմալ հարաբերություններ հաստատել տարածաշրջանում, նաև բացել տրանսպորտային ուղիները՝ պահպանելով ազգային իրավազորության սկզբունքները և ապահովելով նաև փոխադարձությունը, որը դրված է հենց «Խաղաղության խաչմերուկ»-ի հիմքում: Նախորդ տարվա հոկտեմբերին ներկա եմ գտնվել, երբ վարչապետը ներկայացրեց այս նախաձեռնությունը: Մենք ողջունեցինք այն և Հայաստանում ու տարածաշրջանում մեր բոլոր գործընկերների հետ ակտիվորեն աշխատում ենք, որպեսզի նախաձեռնությունը կյանքի կոչվի»,- նշեց Վասիլիս Մարագոսը:

www.armenpress.am

Լրահոս