Հայաստանն այժմ տնտեսության ամենասրընթաց աճն ունի ողջ մոլորակում ի հաշիվ զուգահեռ ներմուծման. Արշինովա

Հայաստանի ՀՆԱ-ն աճում է յոթմղոնանի քայլերով. Հայաստանն այս պահին ունի ամենասրընթաց տնտեսական աճն ամբողջ մոլորակում՝ շնորհիվ զուգահեռ ներմուծման եւ ԵԱՏՄ-ում մեր երկրների միության։ Այս մասին «Եվրասիա. ավանդական արժեքների տարածք» միջազգային հասարակական-գործարար համաժողովի շրջանակում հայտնել է «Եվրասիա» ինքնավար ոչ առեւտրային ընկերության խորհրդի նախագահ, ՌԴ Պետդումայի պատգամավոր Ալյոնա Արշինովան։

«Ինչ վերաբերում է միջպետական ​​հարաբերություններին, ապա հիմա որոշակի տուրբուլենտություն կա, քանի որ Հայաստանի ղեկավարության կողմից արվում են հայտարարություններ, որ մենք միասին զարգացնելու ենք Եվրասիական տնտեսական միությունը, բայց տեսնում ենք, որ Հայաստանի Ազգային ժողովը որոշում է կայացրել եվրաինտեգրման վերաբերյալ, եւ մենք տեսնում ենք, որ Հայաստանը կարող է գնալ Մոլդովայի ճանապարհով։ Մենք տեսնում ենք, որ Հայաստանի ժողովուրդը կողմ է եվրասիական ինտեգրմանը, եւ երկրում բարձր մակարդակով որոշումներ են կայացվում Եվրամիությանը մերձենալու համար։ Իհարկե, մենք չենք կարող թույլ տալ անհավասարակշռություն։ «Հեռանալով մեր ամենամոտ հարեւաններից, ինչպես ասել է ՌԴ փոխվարչապետ Օվերչուկը, եթե Հայաստանը մտնում է Եվրամիություն, ապա դուրս է գալիս Եվրասիական միությունից, դրանք փոխադարձ բացառող գործոններ են»,- ասել է պատգամավորը։

Արշինովան նաեւ ընդգծել է, որ առանց ռուսական էներգետիկ ռեսուրսների, առանց ռուսական ներդրումների եւ հայ-ռուսական ավանդական հարաբերությունների ամեն ինչ այսպես չի զարգանա. «Կլինի տուրբուլենտություն։ Երբ խզում կա ավանդական տնտեսությունից, երբ խզվում են տնտեսական կապերը, անխուսափելիորեն գալիս է միջնորդ, ի նկատի ունեմ ԵՄ-ն, եւ սկսում է երկիրն իր համար ձեւավորել, սկսում է միջամտել գնագոյացմանը, թե ինչ կլինի եվրոպական վաճառասեղաններին, որտեղ հայկական արտադրանքը պետք չէ, ինչ կլինի հայկական շուկայի վաճառասեղաններին»։

Հիշեցնենք, որ «Եվրասիա՝ ավանդական արժեքների տարածք» միջազգային հասարակական եւ գործարար համաժողովն անցկացվում է Մոսկվայում՝ «Ռուսաստան» ազգային կենտրոնում, այն համընկնում է «ԵՎՐԱՍԻԱ» միջազգային համագործակցության խթանման ինքնավար ոչ առեւտրային կազմակերպության ստեղծման առաջին տարեդարձին։

«Եվրասիա. ավանդական արժեքների տարածք» հանրային-գործարար համաժողովը միավորել է մի քանի հարյուր մասնակիցների Հայաստանից, Աբխազիայից, Բելառուսից, Ղրղզստանից, Տաջիկստանից եւ Ուզբեկստանից։

www.news.am