ՀՀ վարչապետի զեկույցը՝ «Խաղաղության խաչմերուկ. միավորելով անվտանգությունն ու ժողովրդավարությունը» խորագրով համաժողովի շրջանակում

Համաժողովի շրջանակում ոսւնեցած ելույթում Փաշինյանը հայտարարել է, որ Իրանն ու Վրաստանն աջակցում են «Խաղաղության խաչմերուկ» նախագծին, իսկ Թուրքիայի դիրքորոշումների հետ նախագիծը կարող է համադրվել: 

«Իրանի Իսլամական Հանրապետությունն այն քիչ երկրներից է, որ հստակ աջակցություն է ցուցաբերում «Խաղաղության խաչմերուկ» նախագծին:

Վրաստանը, ըստ վարչապետի, նույնպես «Խաղաղության խաչմերուկ» նախագծին աջակցող երկրներից է: 

ըստ Փաշինյանի՝ Թուրքիայի դիրքորոշումը կարող է համադրվել Հայաստանի դիրքորոշումներին: «Ըստ էության, «Խաղաղության խաչմերուկ»-ը կարող է ռեալ ինտեգրվել Միջին միջանցքի հետ, որը Թուրքիայի արտաքին քաղաքական կարևորագույն թեմաներից մեկն է: Դա շատ բնականոն ինտեգրում է: Մենք ոչ թե նախագիծը ստեղծել ենք՝ նկատի ունենալով, որ այն պետք է ինտեգրել Միջին միջանցքի նախագծի հետ, այլ այն բնական ճանապարհով ինտեգրվում է դրա հետ»,-ասաց Փաշինյանը:

Խոսելով Ռուսաստանի դիրքորոշման վերաբերյալ իր տպավորություններից՝ Փաշինյանն ասաց. «Տարանցիկ ուղիներն ունեն շատ էական և՛ տնտեսական, և՛ քաղաքական, այդ թվում՝ արտաքին քաղաքական նշանակություն: Ռուսաստանի Դաշնությունը կարող է ունենալ մտահոգություն: Այդ ամբողջ հոսքերի՝ այս տարածքով անցնելը նրա համար կարող է լինել ընդունելի, եթե ինքը շարունակի որոշակի ազդեցություն ունենալ այդ հոսքերի կառավարման վրա: Թե ինչ չափի ազդեցություն՝ էական չէ»:

Անդրադառնալով «Խաղաղության խաչմերուկ»-ի վերաբերյալ արևմտյան որոշ երկրների մոտեցումներին՝ Փաշինյանն ասաց, որ արևմտյան գործընկերները չեն ուզում, որ հոսքերը հիմնականում հոսեն Իրանի տարածքով՝ հարաբերությունների մի շարք հանգամանքների պատճառով:

Ադրբեջանն իր այսօրվա խոսույթով ուզում է, որ Հայաստանի ճանապարհներն օգտագործելի լինեն իր համար, բայց միևնույն ժամանակ Հայաստանը շարունակի մնալ շրջափակման մեջ:

«Ադրբեջանն իր այսօրվա խոսույթով ուզում է, որ Հայաստանի ճանապարհներն օգտագործելի լինեն իր համար, բայց միևնույն ժամանակ Հայաստանը շարունակի մնալ շրջափակման մեջ: Թվում է, թե սա աբսուրդ ձևակերպում է, բայց ադրբեջանական խոսույթի մեր վերլուծությունը ցույց է տալիս դա, որ ճանապարհները բացվեն Հայաստանի տարածքով, բայց Հայաստանը մնա բլոկադայի մեջ»,-ասաց Փաշինյանը՝շեշտելով, որ այդ անտրամաբանական մոտեցումը Հայաստանի համար չի կարող ընդունելի լինել: 

Տարածաշրջանային հաղորդակցությունների բացման համատեքստում վարչապետն անդրադարձավ նաև Ադրբեջանի արևմտյան շրջանների և Նախիջևանի միջև կապին՝ շեշտելով, որ Հայաստանը պատրաստ է տրամադրել այդ կապը: Փաշինյանը հիշեցրեց՝ Ադրբեջանն ասում է՝ եթե Հայաստանն իր պայմաններով չի ցանկանում կապ տրամադրել, ապա իրենք այդ կապի համար կօգտվեն Իրանի տարածքից:

Ըստ նրա՝ այդ խոսույթն ինքնին նշանակում է, որ Ադրբեջանի համար ընդունելի են այն պայմանները, որոնք առաջարկում է Իրանը՝ Ադրբեջանի հիմնական մասի և Նախիջևանի միջև կապ ապահովելու համար։  

«Ակնհայտ է, որ այդ տարբերակն ընդունելի է Ադրբեջանի համար: Եվ մենք էլ ասում ենք, որ Հայաստանը պատրաստ է ճշգրիտ նույն պայմաններով ապահովել Ադրբեջանի արևմտյան շրջանների և Նախիջևանի միջև կապը: Սա շատ կարևոր շեշտադրում է իրադրությունը պարզաբանելու համար: Ավելին՝ մենք ասում ենք, որ այս կապի համար պատրաստ ենք իրականացնել անցման և հսկողությունների որոշակի պարզեցումներ՝ երկրների փոխադարձության, հավասարության, ինքնիշխանության և իրավազորության շրջանակներում»,-ասաց Փաշինյանը՝ հավելելով, որ դա շատ կառուցողական առաջարկ է:  

Բայց նա ընդգծեց, որ Հայաստանն ամենևին չի կարող բացասական արտահայտվել Իրանի տարածքով այդ կապուղիները զարգացնելու վերաբերյալ, որովհետև նախ Իրանը Հայաստանի հարևան ու բարեկամ երկիրն է, բացի այդ՝ դա երկու երկրների ինքնիշխան հարաբերությունների հարց է: 

www.armenpress.am