ՀՀ ԶՈւ-ում նախատեսում են ստեղծել Գլխավոր շտաբի սերժանտի, կորպուսի սերժանտի եւ շտաբի սերժանտի պաշտոններ

ՀՀ Զինված ուժերում նախատեսում են ստեղծել Գլխավոր շտաբի սերժանտի, կորպուսի սերժանտի եւ շտաբի սերժանտի պաշտոններ։ Այս մասին պաշտպանության եւ անվտանգության խորհրդարանական մշտական հանձնաժողովի նիստում, «Պետական պաշտոնյաների եւ պետծառայողների պաշտոններ զբացեղնող անձանց աշխատանքի վճարման մասին» օրենքում փոփոխություններ կատարելու մասին օրինագծի քննարկման ժամանակ, ապրիլի 14-ին ասել է պաշտպանության փոխնախարար Արմեն Սարգսյանը։

Փոխնախարարի խոսքով՝ զինված ուժերի պայմանագրային սերժանտների աշխատավարձերը հաշվարկելիս կկիրառվեն հատուկ գործակիցներ։ «Զինված ուժերում բարեփոխումների իրականացման գործընթացում առաջնային նշանակություն ունի սերժանտական համակարգի զարգացումը, որը պրոֆեսիոնալ զինված ուժերի ստեղծման առանցքային պայմանն է»,- պարզաբանել է Սարգսյանը։

Փոփոխությունների արդյունքում աշխատավարձի գործակիցներ կսահմանվեն գնդի (բրիգադի) սերժանտի եւ գումարտակի (դիվիզիայի) սերժանտի պաշտոնների համար։ «Արեւմտյան երկրների, ինչպես նաեւ Արեւելյան Եվրոպայի բանակների սերժանտական համակարգի ուսումնասիրությունը ցույց է տվել, որ գնդի մակարդակի սերժանտական համակարգը ներառում է Գլխավոր շտաբի եւ բանակի սերժանտների առկայությունը, որոնք ղեկավարում են ստորին մակարդակի սերժանտների գործունեությունը եւ ապահովում սերժանտական համակարգի ուղղահայաց հրամանատարությունը: «Հայաստանի Հանրապետության զինված ուժերում պրոֆեսիոնալ սերժանտական համակարգի լիարժեք ներդրումը եւ նրանց գործունեության պատշաճ ապահովումը ենթադրում է նաեւ բանակի, կորպուսի եւ ավագ սերժանտների պաշտոնների ստեղծում»,- ընդգծել է ՊՆ ներկայացուցիչը։

Այդ առնչությամբ անհրաժեշտություն է առաջացել վերոնշյալ պաշտոնների համար սահմանել աշխատավարձի գործակիցներ։

Որոշ քննարկումներից հետո օրենսդրական նախաձեռնությունը դրական կարծիք է ստացել խորհրդարանական մշտական հանձնաժողովի կողմից։

www.news.am

Լրահոս