Հնդկաստանի հետ ռազմավարական գործընկերային հարաբերություններին մեծ կարևորություն ենք տալիս. Պուտին

Անկախ զարգացման 77 տարիների ընթացքում ձեր երկիրը ընդհանուր առմամբ հանրաճանաչ հաջողությունների է հասել սոցիալ-տնտեսական, գիտական, տեխնիկական և բազմաթիվ այլ ոլորտներում և ձեռք է բերել բարձր հեղինակություն համաշխարհային ասպարեզում: Ըստ Կրեմլի մամուլի ծառայության՝ դրա մասին ասված է ՌԴ նախագահ Վլադիմիր Պուտինի՝ Հնդկաստանի Անկախության օրվա առթիվ շնորհավորական ուղերձում։

«Մենք մեծ կարևորություն ենք տալիս Հնդկաստանի հետ առանձնապես արտոնյալ ռազմավարական գործընկերության հարաբերություններին։

Վստահ եմ, որ Մոսկվայում մեր վերջին բանակցություններից հետո ձեռք բերված պայմանավորվածությունների հետևողական իրականացումը կնպաստի ռուս-հնդկական բազմաբնույթ համագործակցության հետագա զարգացմանը։

Սա, անկասկած, համապատասխանում է մեր բարեկամ ժողովուրդների շահերին և համահունչ է միջազգային կայունության և անվտանգության ամրապնդմանը»,- ընդգծել է Պուտինը։