ՀԹՄՄ շնորհավորանքը՝ Փարավոն Միրզոյանի հոբելյանի առթիվ

Հայաստանի ժողովրդական նկարիչ, «Վահան Թեքեյան» մրցանակակիր Փարավոն Միրզոյանն այսօր նշում է ծննդյան 75-ամյակը։

Փարավոն Միրզոյանը ծնվել է 1949 թվականին։ 1975 թվականին ավարտել է Իլյա Ռեպինի անվան գեղարվեստի ակադեմիան։ Նույն թվականից մասնակցել է հանրապետական, համամիութենական, միջազգային ցուցահանդեսների։

1975 թվականից մինչ օրս Փարավոն Միրզոյանը դասավանդում է Երևանի գեղարվեստի ակադեմիայում, 2014-2019 թթ․՝ նաև Խ․ Աբովյանի անվան մանկավարժական համալսարանում։ Տարբեր տարիներին ղեկավարել է բուհերի մասնագիտական ամբիոնները։ Մինչ օրս վաստակավոր մանկավարժ Փարավոն Միրզոյանն իր նշանակալի ներդրումն ունի գեղանկարիչների սերունդների կրթության գործում, շարունակում է իր հարուստ փորձն ու գիտելիքները փոխանցել երիտասարդներին։

Փարավոն Միրզոյանը Հայաստանի Թեքեյան մշակութային միության անդամ է, «Վահան Թեքեյան» մրցանակակիր։ 2014 թվականին Միության ներկայացմամբ մեծանուն նկարիչը ՀՀ Նախագահի հրամանագրով արժանացել է Ժողովրդական նկարչի կոչման։

2022 թվականին ՀԹՄՄ կազմակերպեց գեղանկարչի՝ «Էրոսը և նկարիչը» խորագրով բացառիկ ցուցադրությունն ու համանուն պատկերագրքի շնորհանդեսը «Թեքեյան կենտրոն»-ում։

Փարավոն Միրզոյանն իր ներկայությամբ մշտապես պատվում է Միության միջոցառումները, նպաստում մշակութապահպան ծրագրերին։

Նրա անմնացորդ նվիրումը արվեստին, ինքնատիպ ձեռագիրն ու բացառիկ տաղանդը նրան ճանաչելի են դարձրել ոչ միայն հայ, այլև միջազգային արվեստասեր հանրության շրջանակներում։

Նա հայ կերպարվեստի այն կարկառուն վարպետներից մեկն է, ում ստեղծագործություններն իրենց ուրույն տեղն ունեն հայ կերպարվեստում, զարդարում են Հայաստանի և արտերկրի բազում հեղինակավոր պատկերասրահների հավաքածուները։

Հայաստանի Թեքեյան մշակութային միությունը շնորհավորում է տաղանդաշատ գեղանկարչին, մաղթում քաջառողջություն, արգասաբեր ստեղծագործական ընթացք, լավատեսություն ու երկար տարիների կյանք։

Հայաստանի Թեքեյան մշակութային միության կենտրոնական վարչություն

Նախագահ` Ռուբեն Միրզախանյան

Լրահոս