ՀԹՄՄ ցավակցությունը` Լալիկ Խաչատրյանի մահվան կապակցությամբ

Խոր վշտով տեղեկացանք Հայաստանի Թեքեյան մշակութային միության անդամ, «Վահան Թեքեյան» մրցանակակիր Լալիկ Խաչատրյանի անժամանակ մահվան լուրը։

Լալիկ Խաչատրյանը ծնվել է 1952 թվականին։ 1969 – 1973 թթ․ սովորել է Մանկավարժական համալսարանի Բանասիրական ֆակուլտետի հայկական բաժնում, 1978 – 1981թթ․՝ Հայոց լեզվի և նրա դասավանդման մեթոդիկայի ամբիոնի հայցորդ էր, իսկ 1983-1985. թ. -ին Մոսկվայում ստացել է Գերմաներենի մասնագետի որակավորման օտար լեզուների պետական դասընթացներ։

2022 թվականին Լալիկ Խաչատրյանն արժանացել է «Վահան Թեքեյան» մրցանակի՝ «Լեզվաբանական տերմինների ուսումնական բառարան»-ի համար։

Անվանի լեզվաբանը 1982 թվականից դասավանդում էր Մանկավարժական համալսարանում՝ որպես Հայոց լեզվի և նրա դասավանդման մեթոդիկայի ամբիոնի դասախոս, դոցենտ, իսկ 2002-ից մինչև օրս նույն ամբիոնի պրոֆեսոր։

Շուրջ մեկուկես տասնամյակ պրոֆեսոր Լալիկ Խաչատրյանը ղեկավարել է նաև Հայոց լեզվի դասավանդման և մեթոդիկայի ամբիոնը։

Մանկավարժական իր ողջ գործունեության ընթացքում Լալիկ Խաչատրյանը կրթել է մանկավարժ-լեզվաբանների մի քանի տասնյակ սերունդների, նրանց փոխանցել ժամանակակից հայոց լեզվի, գրաբարի, հայոց լեզվի պատմության, լեզվաբանության ներածության, ընդհանուր լեզվաբանության և լեզվի տեսության վերաբերյալ հիմնարար ու բազմակողմանի գիտելիքներ։

Դասագրքերի, մենագրությունների, բառարանների, շուրջ 170 հոդվածի հեղինակ էր, որոնք նվիրված էին հայոց լեզվի, լեզվի դասավանդման մեթոդիկայի, հայերենի և այլ լեզուների տիպաբանության տարաբնույթ հարցերին, ինչպես նաև լեզվաբանական նորագույն ուղղություններին։

Հայաստանի Թեքեյան մշակութային միության կենտրոնական վարչություն

Լրահոս