Իմ կերպարը ապաքաղաքական է, ես զբաղվում եմ ազգանվեր գործով․ Նազիկ Ավդալյանը՝ եկեղեցու շուրջ ստեղծված իրավիճակի, Փաշինյանի հետ հանդիպման մասին

Օրերս վարչապետ Նիկոլ Փաշինյանն ընդունել էր ծանրամարտի Աշխարհի և Եվրոպայի չեմպիոն Նազիկ Ավդալյանին։

Aysor.am-ը Նազիկ Ավդալյանից հետաքրքրվեց՝ արդյո՞ք հետևում է վերջին ամիսներին եկեղեցու շուրջ տեղի ունեցող իրադարձություններին և համակարծի՞ք է իշխանությունների քայլերի հետ։

«Եթե նկատած կլինեք, սպորտի զարգացման իմ հիմնադրամի հետ կապված շատ բուռն գործունեության մեջ էի ու այնքան խառն էի, որ այդ ամենին չեմ հետևել։ Ինչ-որ բաներ լսել եմ, բայց չեմ հետևել, այնպես որ, այս պահին չեմ կարող կարծիք հայտնել»,-նշեց նա։

Պատարագների մասնակցո՞ւմ է՝ մարզիկը պատասխանեց.«Որ ասեմ ամեն անգամ մասնակցում եմ՝ կստեմ, բայց հնարավորինս փորձում եմ»։

Նազիկ Ավդալյանը նաև հավելեց, որ մակերեսային տեղեկություններ ունի Շիրակի թեմի առաջնորդ Միքայել արքեպիսկոպոս Աջապահյանին կալանավորելու վերաբերյալ. «Ցավալի է, որ այսպիսին է իրականությունը։ Ինչի մասին մակերեսային տեղեկություններ ունեմ, չեմ ուզում կարծիք հայտնել, որովհետև ամեն ինչ ընթացքի մեջ է։ Այնքան հեշտ է մակերեսային լսել, կարծիք հայտնել ու սխալվել»։

Անդրադառնալով իր հասցեին հնչող քննադատություններին, որ մասնակցել է Աննա Հակոբյանի կազմակերպած ճաշկերույթին և հանդիպել Նիկոլ Փաշինյանին՝ Նազիկ Ավդալյանը շեշտեց. «Ես չեմ ուզում այդ ամենին դրական կամ բացասական երանգավորում տալ, բայց դուք տեսե՞լ եք, որ ես որևէ երեկույթի մասնակցած լինեմ։ Իսկ այդ մարդիկ ինչ-որ ապացույցներ ունե՞ն։ Ես աշխատում եմ նման ճաշկերույթների չմասնակցել, իմ կերպարն էլ ապաքաղաքական է։ Քաղաքականությունը մասնագիտություն է, որին ես չեմ տիրապետում։ Ես անում եմ այն, ինչ կարողանում եմ։ Այս տարիներին սպորտում իմ ձեռք բերած գիտելիքները, արժեքը ցանկանում եմ ծառայեցնել իմ երկրին, գալիք սերունդներին։ Հիմա ստեղծել եմ «Նազիկ Ավդալյան» սպորտի զարգացման հիմնադրամ և ուզում եմ գալիք սերնդի համար հնարավորություն ստեղծել, որպեսզի կարողանան զբաղվել պրոֆեսիոնալ սպորտով։ Կարելի է ասել՝ ազգանվեր գործ եմ անում։ Առաջին նախագիծը մարզերում մարզադպրոցներ կառուցելն է, որի համար պետական աջակցություն է պետք։ Իսկ դա որևէ կապ չունի քաղաքականության հետ»։

Նրա համար ցավալի է, որ պետական ու քաղաքական, կուսակցական ամեն ինչ մարդիկ խառնում են իրար, առանց մանրամասների մեջ խորանալու՝ արժեզրկում տվյալ մարդու գործը։ Հատկապես այն մարդկանց, ովքեր փորձում են իրենց երկրի համար ինչ-որ լավ բան անել։ «Իհարկե, սթափ և գիտակից մարդը հասկանում է, որ այս ամենը քաղաքականության հետ որևէ կապ չունի, սակայն փորձում են արվեստագետների, մարզիկների և այլ ոլորտների գործիչների տարբեր քայլեր քաղաքականության հետ կապել, ինչն այդքան էլ ճիշտ չէ։ Մարդիկ ամեն ինչի մեջ տեսնում են այն, ինչ ուզում են, կապ չունի՝ այդ ամենն իրականության հետ կապ ունի՞, թե՞ չէ»,-հավելեց Նազիկ Ավդալյանը։

Գո՞հ է իշխանություններից՝ Ավդալյանը հարցը հարաբերական համարեց. «Միանշանակ չեմ կարող պատասխանել։ Ես դիմել եմ իմ ծրագրի համար ԿԳՄՍ նախարարությանը։ Մենք հուշագիր ունենք։ Պետական ռազմավարության մեջ կա այդ ծրագիրը, որը համապատասխանում է իմ առաջարկած ծրագրին։ Բնականաբար, ինչպես ակնկալում էի՝ պետական աջակցություն ենք ստանալու»։

www.aysor.am