Իտալիայում Ուկրաինայի դեսպանը Հռոմի քաղաքապետին կոչ է արել չեղարկել Նետրեբկոյի ելույթը

Իտալիայում Ուկրաինայի դեսպան Յարոսլավ Մելնիկը Հռոմի քաղաքապետ Ռոբերտո Գուալտիերին և Հռոմի օպերային թատրոնի ղեկավար Ֆրանչեսկո Ջամբրոնեին կոչ է արել չեղարկել ռուս օպերային երգչուհի Աննա Նետրեբկոյի ելույթը։ Դրա մասին ասված է Հռոմում Ուկրաինայի դեսպանատան ֆեյսբուքյան էջում հրապարակված նամակում, գրում է «Европейская правда»-ն։

Դեսպանը նշել է, որ իմացել է Հռոմի օպերայի՝ Աննա Նետրեբկոյի հետ «Տոսկա»-ի բեմադրությունը 2025 թվականի մարտին վերսկսելու ծրագրերի մասին և խնդրել է վերանայել որոշումը։

«Մենք այս ընտրությունը համարում ենք խիստ խնդրահարույց և անտեղի՝ հաշվի առնելով Նետրեբկոյի նախկին կապերը պուտինյան ռեժիմի հետ և նրա կասկածելի դիրքը անցյալում և Ուկրաինա Ռուսաստանի ներկայիս ներխուժման ժամանակ»,- ասված է նամակում։

Ինչպես նշել է դեսպանը, Նետրեբկոն շարունակ պնդում է, որ ինքը քաղաքականությունից դուրս է, բայց երբեք չի թաքցրել Ռուսաստանի նախագահին իր աջակցությունը։

«Նրա մասնակցությունը իտալական օպերայի և մշակույթի համար նման կարևոր իրադարձությանը, որն, անկասկած, կունենա զգալի միջազգային հնչեղություն, վիրավորանք է... ուկրաինացի ժողովրդի, մասնավորապես մեր հազարավոր համաքաղաքացիների, ինչպես նաև նրանց, ովքեր երկար տարիներ ապրել են Իտալիայում և այն փախստականների համար, ովքեր Ուկրաինա ռուսական լայնածավալ ներխուժումից հետո ապաստան են գտել Իտալիայում»,- հայտարարել է դեսպանը։

Մելնիկը նշել է, որ ներկա պայմաններում անընդունելի է Նետրեբկոյին և այսպես կոչված «ռուսական աշխարհի» այլ ներկայացուցիչների հրավիրել աշխարհի ամենահեղինակավոր բեմերից մեկում ելույթ ունենալու։

2022 թվականի փետրվարին Ուկրաինայում պատերազմի բռնկումից հետո Նետրեբկոն բախվեց Արևմուտքում իր համերգների բոյկոտին։ Նրան միաժամանակ հեռացրել են Նյու Յորքի Մետրոպոլիտեն օպերայից։ Այս գարնանը Գերմանիայի Վիսբադեն քաղաքում Նետրեբկոյի ելույթի դեմ ևս բողոքի ցույցեր եղան:

Լրահոս