Մայիսյան եռատոն. Եռատոնը սովորական օր չէ

Մայիսյան լուսաբացին, երբ հայոց երկինքը ողողվում է արևի առաջին ջերմ շողերով, Հայ ժողովուրդը կանգ է առնում մի պահ՝ գլուխ խոնարհելով պատմության այն հերոսական էջերի առջև, որոնք ձևավորեցին մեր այսօրվա գոյությունն ու արժանապատվությունը։

Մայիսի 9-ին Հայաստանի Հանրապետությունը նշում է Եռատոնը՝ Հայրենական մեծ պատերազմում հաղթանակը, Շուշիի ազատագրումը և Արցախի պաշտպանության բանակի կազմավորման տարեդարձը։

Եռատոնը սովորական օր չէ. այն հիշեցում է, որ մեր գոյության հիմքում ունենք պողպատե կամք, որը կոփված է պատերազմի դաշտերում, պաշարված քաղաքների մեջ, հայ զինվորի բոցկլտացող աչքերում։

1992 թվականի մայիսի 9-ին հայկական զորքերը ազատագրեցին Շուշին՝ Արցախի սրտում բազմած բերդաքաղաքը, որը ռազմավարական, հոգևոր և պատմական հզոր նշանակություն ուներ մինչև 44 օրյա պատերազմը։ Այդ օրը դարձավ Արցախի ազատագրման պայքարի վճռորոշ շրջադարձ, երբ հայ զինվորը՝ զենքը ձեռքին, վերականգնեց ոչ միայն հողը, այլ նաև արդարության ու ինքնության զգացումը։

Եվ հենց այդ նույն օրը՝ 1992-ի մայիսի 9-ին, ծնվեց Արցախի Պաշտպանության բանակը՝ որպես անկախության ու ինքնապաշտպանության իրավունքի մարմնավորում։ Զինվորից մինչև հրամանատար՝ նրանք դարձան ժողովրդի պատը՝ կանգնած հողին ու հենված հիշողությանը։

Այդ բանակը ստեղծվեց ոչ թե ռազմատենչությամբ, այլ անհրաժեշտությամբ, երբ խաղաղություն պահելու միակ ճանապարհը՝ պաշտպանելն էր։

Շուշիի հաղթանակը լուսաբաց էր՝ արյան գնով վաստակված, բայց հավատքի հողի վրա կերտված։

Հայաստանի Թեքեյան Մշակութային Միությունը խոնարհվում է բոլոր հերոսների հիշատակի առաջ և հպարտությամբ շնորհավորում հայ ժողովրդին այս սրբազան եռատոնի կապակցությամբ։