Մեր ընդհանուր ջանքերով հետևողականորեն ամրանում է ԱՊՀ հեղինակությունը․ Պուտին

ԱՊՀ երկրների ղեկավարները կոնկրետ եւ առարկայական քննարկել են կառույցի շրջանակներում համագործակցությանը վերաբերող արդիական հարցեր։ Հոկտեմբերի 8-ին Մոսկվայում կայացած ԱՊՀ երկրների ղեկավարների խորհրդի նեղ կազմով նիստի ավարտին հայտարարել է ՌԴ նախագահ Վլադիմիր Պուտինը։

«Մտքեր ենք փոխանակել տարածաշրջանային եւ միջազգային խնդիրների շուրջ, համաձայնեցվել են կարևոր որոշումներ, որոնցով պայմանավորվում է ԱՊՀ համագործակցության զարգացումը՝ ինչպես գալիք տարվա, այնպես էլ ապագայի համար։ Բոլոր այստեղ հավաքված առաջնորդները հանդես են գալիս համագործակցության հետագա խորացման օգտին, և մենք տեսնում ենք, որ մեր ընդհանուր ջանքերով հետևողականորեն ամրանում է ԱՊՀ հեղինակությունը` որպես ինտեգրացիոն միավորման։ Համագործակցության անդամները գործում են բացառապես փոխըմբռնման, իրավահավասարության և բարյացակամության սկզբունքներով։ Հաջողությամբ լուծում են առանցքային խնդիրներ` միտված մեր քաղաքացիների բարեկեցությանը եւ որակյալ կենսապայմաններին»,- իր ելույթում ընդգծել է ՌԴ նախագահը։

Անկախ պետությունների համագործակցությունն, ըստ Պուտինի, չի սահմանափակվում տնտեսական հաջողություններով, քանի որ զարգանում է համագործակցությունը նաեւ հումանիտար ուղղությամբ։

«Այն հիմնված է մեր ժողովուրդների փոխադարձ շահերի, մշակույթի եւ ավանդույթների վրա։ Մենք բոլորս հասկանում ենք մեր ընդհանուր պատմության հիշողության պահպանման կարևորությունը եւ շատ բան ենք անում դրա համար։ Հաջորդ տարի նշելու ենք Սովետական ժողովրդի Հաղթանակի 80-ամյակը, այդ համատեքստում, մեր նստաշրջանի արդյունքներով, կընդունվի միասնական կոչ` ուղղված մեր ժողովուրդներին եւ համաշխարհային հանրությանը»,- ասել է ՌԴ նախագահը եւ ավելացրել, որ Ռուսաստանից հետո ԱՊՀ ղեկավարությունը 2025թ հունվարի 1-ից կստանձնի Տաջիկստանը։

www.armenpress.am

Լրահոս