Մերկելը գիտեր ՌԴ-ի Եվրոպա գազի մատակարարումը սահմանափակելու մտադրությունների մասին

Գերմանիայի նախկին կանցլեր Անգելա Մերկելը, մինչև 2021 թվականի վերջին իր հրաժարականը, գիտեր Եվրոպա գազի մատակարարումը սահմանափակելու՝ Ռուսաստանի մտադրության մասին, բայց թաքցնում էր այդ տեղեկատվությունը, գրում է Handelsblatt թերթը, որին հասանելի են դարձել «Հյուսիսային հոսք 2» գազատարի գաղտնի փաստաթղթերը։

Գերմանիայի կառավարությունը Ռուսաստանին կասկածում էր շանտաժի մեջ. երկրի էկոնոմիկայի նախարարության 2021 թվականի օգոստոսի նոտայում, մեջբերված Handelsblatt-ի կողմից, ասվում էր, որ գազի դեֆիցիտ առաջացնելով՝ ռուսական իշխանությունները կարող են փորձել ստիպել «Հյուսիսային հոսք 2»-ի գործարկումը մինչև Գերմանիայի իշխանությունները կիրականացնեն անհրաժեշտ հավաստագրումը։

Փաստաթղթում նշվում էր, որ Ռուսաստանի վարքագիծը «կարող է ունենալ դրամատիկ հետեւանքներ», իսկ գազի պահեստարանների լիցքավորումը «շատ դանդաղ» է ընթանում. 2021 թվականի հուլիսին «Գազպրոմին» պատկանող պահեստարանները լցված էին միայն կիսով չափ։

Գրությունը, ըստ Handelsblatt-ի, ուղարկվել է այն ժամանակվա էկոնոմիկայի նախարար և Մերկելի մերձավոր դաշնակից Պետեր Ալթմայերին, ով այդ մասին տեղեկացրել է նախարարների կաբինետին: Սակայն, 2021 թվականի հոկտեմբերին, գրում է Handelsblatt-ը, Մերկելը, պատասխանելով թերթի լրագրողի հարցերին, ասաց, որ նշաններ չի տեսնում, որ Ռուսաստանը կրճատում է գազի մատակարարումները Եվրոպա։

2021 թվականի հոկտեմբերի վերջին Վլադիմիր Պուտինը հանձնարարել է «Գազպրոմին» սկսել ծրագրված աշխատանքները՝ եվրոպական պահեստներում վառելիքի ծավալն ավելացնելու ուղղությամբ։ Այդ ժամանակ գազատարի շինարարությունը գրեթե ավարտված էր։ Սակայն, 2022 թվականի փետրվարին, երբ Ռուսաստանը ճանաչեց ինքնահռչակ ԴԺՀ-ն և ԼԺՀ-ն, Գերմանիայի նոր կանցլեր Օլաֆ Շոլցի կառավարությունը հայտարարեց «Հյուսիսային հոսք 2»-ի շահագործման սառեցման մասին:

2022 թվականի սեպտեմբերի վերջին Բալթիկ ծովի հատակով հոսող «Հյուսիսային հոսք 1» և «Հյուսիսային հոսք 2» գազատարների վրա մի շարք պայթյուններ տեղի ունեցան, ինչի հետևանքով չորս թելերից երեքը վնասվեցին: Հայտնի չէ, թե ով է կանգնած եղել պայթյունների հետևում. դրանք դիտվել են որպես և՛ ուկրաինական, և՛ ռուսական հետք։ Եվրոպական մի քանի երկրներ հետաքննություն են սկսել, սակայն երկու երկրներ՝ Դանիան և Շվեդիան, արդեն դադարեցրել են այն։ Գերմանիայում հետաքննությունը դեռ շարունակվում է։

Լրահոս