ՄԵԾ ԲՐԻՏԱՆԻԱՅՈՒՄ ՀԱՅՏՆԱԲԵՐՎԵԼ Է ՏՐՈՅԱԿԱՆ ՊԱՏԵՐԱԶՄԻ ԼԵԳԵՆԴԻ ԱՅԼԸՆՏՐԱՆՔԱՅԻՆ ՄԵԿՆԱԲԱՆՈՒԹՅԱՄԲ ՀՆԱԳՈՒՅՆ ԽՃԱՆԿԱՐ

Մեծ Բրիտանիայում հնագետները հայտնաբերել են անցյալ դարի ամենանշանակալի հռոմեական խճանկարներից մեկը, որը ոչ միայն զարմանալիորեն լավ է պահպանվել, այլև պատկերում է Տրոյական պատերազմի պատմության անսովոր տարբերակը, գրում է Live Science-ը:

Ketton Mosaic անվամբ հայտնի խճանկարը հայտնաբերվել է Քեթթոն գյուղի մերձակա դաշտում՝ այժմյան Ռատլանդում։ Գիտնականները կարծում են, որ այն մեծ, էլիտար տան՝ տրիկլինիումի, ճաշասենյակի հատակի մի մասն էր, որտեղ հռոմեացի տնային տնտեսուհիները հյուրեր էին ընդունում և խնջույքներ կազմակերպում։

Խճանկարը զբաղեցնում է մոտավորապես 10x 5,3 մետր մակերես և թվագրվում է մ.թ. 4-րդ դարին, բայց կալվածքն ինքնին, հավանաբար, օգտագործվել է ավելի վաղ։ Կենտրոնական մոտիվը պատկերում է հույն հերոս Աքիլլեսի և տրոյացի արքայազն Հեկտորի պայքարի տեսարաններ, որոնք Տրոյական պատերազմի լեգենդի հիմնական դրվագներն են։ Երեք վահանակներ պատկերում են Աքիլեսի և Հեկտորի մենամարտը Պատրոկլեսի մահից հետո, երբ Աքիլեսը Հեկտորի մարմինը քարշ է տալիս իր կառքի հտևում, ապա Պրիամոս թագավորի հետ բանակցում է ոսկու փրկագնի դիմաց մարմինը վերադարձնելու համար։

Առաջին հետազոտողները ենթադրել են, որ տեսարանները համապատասխանում են Հոմերոսի «Իլիական»-ի նկարագրություններին, որն առասպելի ամենահայտնի տարբերակն է։ Սակայն մանրամասն վերլուծությունը բացահայտել է հոմերոսյան տեքստի հետ անհամապատասխանություններ. օրինակ՝ «Իլիական»-ում Աքիլեսը հրաժարվում է ոսկի ընդունել Հեկտորի մարմնի դիմաց, մինչդեռ խճանկարը հենց այս փրկագնի պահն է պատկերում։ Ըստ Britannia ամսագրում հրապարակված նոր ուսումնասիրության՝ պատկերման ոճը և մանրամասները վկայում են աթենացի դրամատուրգ Էսքիլեսի «Փռյուգիացիները» վաղուց կորած ողբերգության ազդեցության մասին, իսկ ողբերգության հատվածները պահպանվել են միայն երկրորդական աղբյուրների միջոցով։

Խճանկարի պատկերները ներառում են դիզայնի տարրեր, որոնք դարեր շարունակ շրջանառվել են Հին Միջերկրական ծովում, ինչը ենթադրում է, որ հռոմեական Բրիտանիայի արհեստավորները սերտորեն կապված են եղել դասական աշխարհի ավելի լայն մշակութային և գեղարվեստական ավանդույթների հետ։ Այս հայտնագործությունն ամրապնդում է այն գաղափարը, որ հռոմեական Բրիտանիա նահանգը մեկուսացված չէր, այլ ակտիվորեն կլանել և վերամշակել է կայսրության տարբեր մասերի և դրա սահմաններից դուրս եղած մշակութային մոտիվները։

www.golosarmenii.am

Լրահոս