Մի՛ փնտրեք կոռուպցիոն ռիսկեր այնտեղ, որտեղ դրանք չկան, որովհետև միևնույն է, սենսացիա չեք գտնի. Նաթան Սրբազանը՝ Մայր տաճարի նորոգման մասին

Այն կանխավարկածը, որ Մայր տաճարի վերանորոգման գումարներ կարող են փոշիացվել, կարծում եմ՝ այդ խոսույթից մենք պետք է հրաժարվենք՝ հաշվի առնելով, թե ում մասին է խոսքը, լրագրողների հետ այսօրվա հանդիպման ժամանակ ասաց Գերաշնորհ Տեր Արշակ արքեպիսկոպոս Խաչատրյանը:

Հարցին՝ ինչո՞ւ այդքան երկար տևեց Մայր տաճարի վերանորոգումը՝վերջինս պատասխանեց. «Մայր տաճարի շինարարությունն, ըստ էության, սկսվել է 2017-ին: 2012-ից 2017-ը ուղղակի ուսումնասիրական աշխատանքներ են արվել: Մայր տաճարի վթարայնությունը շատ պատահական է բացահայտվել: Երբ անհրաժեշտություն առաջացած Մայր տաճարի գմբեթի խոտերը հեռացնել, պարզվեց, որ այդ ճաքերը խորանում են մինչև հիմքեր, այսինքն Մայր տաճարը վթարային վիճակում էր:

Հիմա ես ալտերնատիվ սցենարը չունեմ, թե նմանօրինակ մի կառույց, մի տաճար նորոգելու համար արդյոք ավելի կարճ ժամանակամիջոցում հնարավոր էր անել: Դա մասնագետները պետք է ասեն, և նրանք են, որ այս աշխատանքներն իրականացրել են: Ես կարծում եմ՝ ժամանակահատվածն օպտիմալ է եղել»:

Մայր Աթոռ Ս. Էջմիածնի  Արտաքին հարաբերությունների և արարողակարգի բաժնի տնօրեն Տ. Նաթան արքեպիսկոպոս Հովհաննիսյանն Իր հերթին նշեց՝ ինքը հասկանում է, որ մամուլի շուկայում կոռուպցիոն ռիսկերով նման նորությունները շատ ավելի հետաքրքրական ու արժեքավոր են:

«Մյուս կողմից մեր բարերարները, որոնք տալիս են այդ գումարները, իրենք իրենց տված գումարների հետքերով գնում են: Եթե ամբողջական պատկերն ենք ուզում իմանալ, այս տարվա վերջին բարձրագույն հոգևոր խորհրդին հաշվետու ժողով կլինի և հաշվետվությունը կլինի Մայր տաճարի նորոգման հետ կապված: 

Մի՛ փնտրեք կոռուպցիոն ռիսկեր այնտեղ, որտեղ դրանք չկան, որովհետև միևնույն է, սենսացիա չեք գտնի: Եթե լինի էլ, հնարավոր է, որ հնարովի մնացածին բաներ լինեն»: