Միրզոյանի հետևից քիչ էր մնում ջուր շփեին․ ոչ թե ԵՄ-ի արտգործնախարարների հավաք էր, այլ ոչ պաշտոնական նախաճաշ. Մամիջանյան

Հայտարարվում էր, որ Արարատ Միրզոյանը գնում է մասնակցելու ԵՄ արտաքին գործերի նախարարների հավաքին, քիչ էր մնում ջուր շփեին հետևից: Վերջում պարզվեց, որ ինքը մասնակցում է ընդամենը ոչ պաշտոնական նախաճաշի: Այս մասին ճեպազրույցի ժամանակ ասել է «Պատիվ ունեմ» խմբակցության ղեկավար Հայկ Մամիջանյանը:

«Դրանից մեկ շաբաթ առաջ հերթական խաբեությունն էր տեղի ունենում, անդադար ասում էին, որ ստրատեգիական, ռազմավարական գործընկերություն ենք կնքում և այլն, և այլն, փաստաթուղթը հրապարակվեց, պարզվեց, որ դա ռազմավարական գործընկերություն չէր, դա ընդամենը ռազմավարական օրակարգ էր, սովորական գործընկերության ռազմավարական օրակարգ, այսինքն՝ ավելի պարզ լեզվով ասեմ, ոչ թե շատ կարևոր հարաբերությունների թուղթ, այլ հարաբերությունների կարևոր թուղթ: Փաշինյանի ոճի մեջ է նմանօրինակ խայտառակ մանիպուլյացիաները և ստերը, սա ուղղակի ծիծաղելի է,-նշել է նա:

Մամիջանյանն ասել է, որ իրենց և այս պահին շուրջ 50 քաղբանտարկյալի իշխանությունը անդադար փորձում է մեղադրել, կապելով իրենց ինչ-որ արտաքին կապերի, բայց նշվածներից ոչ մեկի նկատմամբ նման հոդված հարուցած չէ։

«Նույնիսկ այն մարդկանց հանդեպ, որոնք շինծու հոդվածով անազատության մեջ են, իրենց համար «կարվել» են այլ հոդվածներ, իրենց համար չի գրվել, որ ինչ-որ արտաքին ներգործություն և այլն: Փաշինյանն այդպես էլ չի հասկանում, որ ինքը այլևս ծախու խմբագիր չէ, ինքը չի կարող հանդես գալ օդում կախված լուրերով»,-հավելել է «Պատիվ ունեմ» խմբակցության ղեկավարը:

www.tert.am

Լրահոս