Մնացեք ամուր, մնացեք հավատարիմ մայր եկեղեցուն, որ դարեր շարունակ, որպես ծնող, իր թևերի տակ է հավաքել իր ձագերին. Տեր Մաղաքիա

Հանդիսավորությամբ նշվել է Արագածոտնի թեմի Վարդենուտ համայնքի Սուրբ Մերկեռիոս եկեղեցու օծման 6-րդ տարեդարձը։

Այս առիթով, Ն.Ս.Օ.Տ.Տ. Գարեգին Բ Ամենայն Հայոց Կաթողիկոսի Հայրապետական տնօրինությամբ և Արագածոտնի Թեմի Առաջնորդ Գերաշնորհ Տեր Մկրտիչ եպիսկոպոս Պռոշյանի օրհնությամբ, Մայր Աթոռ Սուրբ Էջմիածնից առաջին անգամ եկեղեցի է բերվել Սուրբ Գևորգ Զորավարի մասունքը ։

Տոնական Սուրբ Պատարագը մատուցել է Արագածի հովվության հոգևոր հովիվ՝ Արժանապատիվ Տեր Մաղաքիա քահանա Գևորգյանը:

Տեր Հայրն հավատացյալներին ուղղված իր խոսքում, կարևորելով քրիստոնյայի կյանքում աներեր հավատք ունենալը, Սրբերի օրինակին հոռևելը, մայր եկեղեցուն հավատարիմ լինելը և աշխարհիկ գայթակղություններին չտրվելը, նշել է․ «Մաքրությունը այն է, երբ մարդ իր կյանքում առաջինը ունենում է հավատք Աստծո հանդեպ, մնում է հավատարիմ մայր եկեղեցուն և քայլում է Քրիստոսի՝ մեր Աստծո մեզ ցույց տված և պատգամած այդ լուսավոր ճանապարհով՝ դեպի երկնքի արքայությունը։

Սրբերը գալիս են մեզ ասելու, որ մենք մնացինք հավատարիմ մեր Տիրոջը։ Մենք այնքան Աստծուն սիրեցինք, այնքան նվիրվեցինք, որ գնացինք նահատակության հանուն Աստծու։ Գալիս են ասելու գոտեպնդվեցեք և մի տրվեք գայթակղություններին։

Այն ժամանակ սրբերը ապրում էին սուրը կախված գլխավերևում և ամեն պահ հնարավոր էր նահատակություն։ Իրենք դա գիտեին, բայց մնացին հավատարիմ Քրիստոսին։ Բայց այսօր մենք Աստծուն թողնում ենք մի կողմ և տրվում ենք այդ գայթակղություններին՝ նյութական թե հոգևոր, թողնելով այն ճշմարտությունը, որ Աստված է մեզ պատգամել։

Այսօր Սրբերը եկել են ասելու մեզ․ մնացեք ամուր, մնացեք հավատարիմ մայր եկեղեցուն, որ դարեր շարունակ, որպես ծնող իր թևերի տակ է հավաքել իր ձագերին։ Եկեղեցին գթացող մոր պես իր զավակին պահել է և կպահի․․․»:

www.aysor.am