Ո՞ր կրթությունը մենք պետք է զարգացնենք. Այդ հարցի պատասխանը տալիս է «իրական Հայաստանի» գաղափարախոսթյունը. նախարար

Կրթական համակարգի դերը ամբողջությամբ պատկերացնելու համար մի կարևոր սկզբունք պիտի հիշենք, որ կրթությունը հանրային բարիք է, և սա ունի շատ կոնկրետ դրսևորում պետության համար։ Այս մասին ՀՀ պետական մարմինների ներկայացուցիչների առաջին համաժողովում պանելային քննարկման ժամանակ նշեց ԿԳՄՍ նախարար Ժաննա Անդրեասյանը։

«Ավելի կրթված հասարակությունները ունեն ավելի լավ կառավարություններ, որովհետև կրթված հասարակությունը և կրթված մարդիկ դրանք նաև քաղաքացիական ավելի բարձր գիտակցություն ունեցող, ավելի մեծ ընդգրկվածություն ունեցող մարդիկ են, որոնք նաև այդպիսով կարողանում են գիտակցված որոշումներ կայացնել, այդ թվում, օրինակ, ընտրությունների ժամանակ։

Նրանք մարդիկ են, որոնք նաև հանրային հսկողության մեխանիզմների հանդեպ ունեն առավել մեծ զգայունություն, ինչը այդ թվում կոռուպցիայի կանխարգելման կարևորագույն գործիքներից է։ նրանք մարդիկ են նաև, որոնք ավելի բարձր արտադրողականություն ունեն և այսպիսով նաև ավելի կրթված հասարակության միջոցով տնտեսական զարգացման ուղու հնարավորություն է ստեղծվում։

Սա ցույց է տալիս, որ իսկապես կրթությունը այն ճանապարհն է, որով պիտի գնանք մեր պետությունը զարգացնելու ճանապարհին, բայց ո՞ր կրթությունը զարգացնելու։ Այդ հարցի պատասխանը տալը նույնքան կարևոր է, ինչքան կրթական համակարգում զարգացման նուղղված մյուս քայլերը։

Ես կարծում եմ, որ իրական Հայաստանի գաղափարախոսությունը տալիս է այդ հարցի պատասխանը, ու ես կարծում եմ, որ կրթական ծրագրերն ու բովանդակությունը պետք է գնան այդ քաղաքականությունը նաև կրթական բովանդակություն դարձնելու ճանապարհով։ Սա ուղիղ խնդիր է, որը պետք է լուծվի կրթական ծրագրերի, ուսումնական նյութերի և դրան հաջորդող գործընթացների միջոցով»,– հայտարարեց նա։