Ոստիկանությունն ուժային կառույց է, ինչը նշանակում է, որ այն ուժ գործադրելու լեգիտիմ իրավունք պետք է ունենա

Կառավարության նիստի ժամանակ ՆԳՆ փոխնախարար Արփինե Սարգսյանը հայտարարեց, որ ոստիկանության գվարդիան ոստիկանության կառուցվածքային ստորաբաժանում է, որը կոչված է պաշտպանելու անձի իրավունքները և ազատությունները, ինչպես նաև ապահովելու հասարակության և պետության անվտանգությունը։
«Ոստիկանության գվարդիայի ընդհանուր ղեկավարումն իրականացնելու է ոստիկանության պետը, իսկ անմիջական ղեկավարումը՝ ոստիկանության գվարդիայի հրամանատարը:
Ոստիկանության գվարդիայի ղեկավարման մանրամասները սահմանվում են ոստիկանության գվարդիայի կանոնադրությամբ»,-նշեց Սարգսյանը:
Ոստիկանության գվարդիայի հրամանատարը կնշանակվի մինչև 2025 թվականի հունվարի 10-ը: Ոստիկանության գվարդիայի ամբողջական ձևավորումն իրականացվելու է ոստիկանության գվարդիայի հրամանատարի նշանակումից հետո՝ երկամսյա ժամկետում:
Մինչև ոստիկանության գվարդիայի ծառայող նշանակվելը, ոստիկանության զորքերի զինծառայողները շարունակելում են իրականացնել իրենց պարտականությունները և իրավունքները՝ հանդես գալով որպես ոստիկանության զորքերի զինծառայողներ:
«Կարծում եմ՝ սա ճիշտ մոտեցում է: Ոստիկանության բարեփոխումների թեմայով վերջին երկու տարիների ընթացքում միայն իմ մասնակցությամբ 10-ից ավելի քննարկումներ են եղել: Ունենք պատշաճ նախագիծ՝ ոստիկանության նոր համակարգ ձևավորելու: Ուզում եմ ընդգծել՝ այն համապատասխան է ժողովրդավարության մեր պատկերացումներին: Ոստիկանությունն ուժային կառույց է, ինչը նշանակում է, որ այն ուժ գործադրելու լեգիտիմ իրավունք պետք է ունենա, հակառակ դեպքում՝ այն կլինի անիմաստ կառույց: Սա կարևոր է և՛ ոստիկանին, և՛ քաղաքացուն պաշտպանելու համար»,-արձագանքեց վարչապետ Նիկոլ Փաշինյանը:

Լրահոս