Ով կդառնա ՀԷՑ-ի գնորդը, դեռ մեծ հարց է. Ֆինանսների նախկին նախարար

Ես դժվարանում եմ ասել՝ կարողանա՞ն ՀԷՑ–ի համար գնորդ գտնել, թե ոչ, իսկ Կարապետյանների կողմից 500 մլն դոլար գնահատելը կարծում եմ՝ իրատեսական է։ Այս մասին NEWS.am–ի հետ զրույցում նշեց Ֆինանսների նախկին նախարար Վարդան Արամյանը։

«500 միլիոն դոլարը շատ մեծ չի ՀԷՑ–ի համար, որովհետև ինքը մոնոպոլ է, իր կանխիկ հոսքերը կանխատեսելի են, ակտիվների արդյունքով ինքը 337 միլիարդ դրամանոց ընկերություն է։ Այսինքն խելքին մոտ է այդ 500 միլիոնը։

Այստեղ պետք է նայենք, թե որքանով է հավանական, որ կառավարությունը կարողանա հակառակը փաստել, ես չեմ կարծում, որ կառավարությունը մասնագիտորեն կկարողանա հիմնավորել, որ իր այս գործողությունները իրականում օբյեկտիվ են և իրատեսական են։ Այն հիմնավորումները, որը ներկայացնում է գործող կառավարիչը, ես չեմ կարծում, որ դրա տակ կա լուրջ տնտեսագիտական կամ ֆինանսական միսկ, որ էական ազդեցություն են առաջացրել»,–ասաց նա։

Նախկին նախարարը նշեց, որ պետք է տարանջատել երկու հարց՝ նախ, ով է լինելու հաջորդ գնորդը և երկրորդը արբիտրաժային գործընթացը։ Արբիտրաժային գործընթացում Սամվել Կարապետյանի թիմը վիճարկում է կառավարության գործողությունները և ասում են՝ դուք ձեր գործողություններով հիմնադրին վնաս եք պատճառել և այն վնասը, որը մենք գնահատում ենք, 500 միլիոն է։ Եվ եթե դուք հիմա առգրավում եք կամ բռնագրավում եք այդ ակտիվները ինձանից, դրա արժեքը 500 միլիոն է։ Կառավարությունը պետք է գա հակառակը փորձի ապացուցել։ Այստեղ մենք կառավարության համար ունենք վատ լուր, որովհետև արդեն իսկ կառավարությունը մեկ անգամ արբիտրաժի որոշումը չկատարեց, որը միջազգային արբիտրաժների պրակտիկայի մեջ լավ բան չէ»,– ասաց Արամյանը։

Նա նշեց, որ եթե «Տաշիր կապիտալը» հաղթի այս գործը, դա նշանակում է, որ այդ գումարը չի վճարելու կառավարությունը, դա վճարելու է հարկատուն, մենք ձեզ հետ միասին՝ մեր հարկերի հաշվին։

Իսկ դա նշանակում է որ այն գումարները, որով որ մենք պետք է զինամթերք գնեինք մեր պաշտպանության համար, ճանապարհներ պետք է սարքեինք, դպրոցները պետք է սարքեինք, կառավարության գործողությունների արդյունքում մենք պետք է փոխհատուցենք վնասը այդ ընկերության։

Ո՞վ կդառնա նոր գնորդը, դա դեռ հարց է։ Եթե ես լինեի արտաքին ներդրողի փոխարեն, այսպիսի խառը խաղի մեջ չէի մտնի։ Ես կասեի՝ արբիտրաժում գործ կա, ու չգիտենք, թե վճիռն ինչ կլինի։ Ես այդ ռիսկային գործարքին չեմ գնա։ Երկրորդը, քանի որ այստեղ կան նաև կառավարության գործողություններ, որը բոլորն են ասում՝ մաքուր տնտեսական և ֆինանսական, չէ, կա այդտեղ նաև քաղաքական կոմպոնենտը, ամեն ինչ կյանքում հնարավոր է, կարող են քաղաքական փոփոխություններ լինեն և նոր կառավարությունը միգուցե այլ աչքով նայի նոր սեփականատիրոջը։ Դրա համար այս տեսանկյունից բարդ է լինելու նաև նոր գնորդի գտնելը»,– ընդգծեց Վարդան Արամյանը։

www.news.am