Օվերչուկ. Հայաստանի անդամակցությունը ԵՄ-ին կփակի ԵԱՏՄ շուկան Երևանի համար

Ռուսաստանի Դաշնության փոխվարչապետ Ալեքսեյ Օվերչուկը հայտարարել է, որ Հայաստանի անդամակցությունը Եվրամիությանը կհանգեցնի Երևանի՝ Եվրասիական տնտեսական միությունից (ԵԱՏՄ) դուրս գալուն և երկրի համար ԵԱՏՄ շուկայի փակմանը։

Այս մասին հայտնում է ՏԱՍՍ-ը՝ վկայակոչելով ՌԴ փոխվարչապետի հայտարարությունը։ «Լուծումը շատ ակնհայտ է. Եվրամիության հետ շուկաների բացումը կնշանակի շուկաների փակում Եվրասիական տնտեսական միության հետ: Հակառակ դեպքում, կտուժեն Եվրասիական տնտեսական միության մեր արտադրողները, դա ակնհայտ է»,- նշել է ՌԴ փոխվարչապետը։

Նա նաև նշել է, որ Հայաստանի համար ԵՄ-ի հետ ներմուծման մաքսային դրույքաչափերի զրոյացումն ինքնաբերաբար կնշանակի վերադարձ ԵԱՏՄ-ի հետ մաքսային սակագներին։ «Մեզ համար, իհարկե, սա ազդանշան է, որ Եվրամիությանն անդամակցելու սկիզբը ԵԱՏՄ-ից դուրս գալու սկիզբն է»,- նշել է Օվերչուկը։

Օվերչուկը վստահ է, որ դա բացարձակապես ակնհայտ է ցանկացած մարդու համար, ով թեկուզ մի փոքր ծանոթ է այս երկու ինտեգրացիոն ասոցիացիաների կառուցվածքին։ «Այստեղ նրանք (խմբ․ Հայաստանը) միանգամայն հստակ գիտեն, որ հետևանքներն այսպիսին են լինելու, այստեղ ոչ ոք չպետք է պատրանքներ ունենա»,- ընդգծել է ՌԴ փոխվարչապետը։ Նրա խոսքով՝ մարդիկ, ովքեր այժմ Հայաստանում ընթացող քննարկումների մեջ են ու պնդում են, թե իբր հնարավոր կլինի ինչ-որ լուծում գտնել, մեղմ ասած, մոլորեցնում են հայ ժողովրդին։ Օվերչուկը նաև նշել է, որ ԵՄ-ին Հայաստանի անդամակցության գործընթացը երկար է լինելու և կոչ է արել սպասել այս հարցով Հայաստանի խորհրդարանում լսումների արդյունքներին։ ՌԴ փոխվարչապետը, անդրադառնալով նաև ԵՄ-ի և ԵԱՏՄ-ի հետ Հայաստանի տնտեսական ցուցանիշներին, նշել է, որ Եվրասիական տնտեսական միության երկրների հետ Հայաստանի ապրանքաշրջանառությունն աճում է, իսկ Երևանի առևտուրը Եվրամիության հետ՝ նվազում։ «Իրավիճակը Հայաստանի հետ տնտեսական ուղու վրա շատ լավ է: Հայաստանը ակտիվ դեր է խաղում Եվրասիական տնտեսական միությունում և իրեն կառուցողական է պահում: Ինչպես բազմիցս ասել եմ, Հայաստանը Եվրասիական տնտեսական միության հիմնական շահառուն է»,- նկատել է նա։ Օվերչուկի տեղեկացմամբ՝ անցյալ տարի Հայաստանի առևտուրը ԵԱՏՄ-ի հետ 12 միլիարդ դոլար էր, ինչը մի քանի անգամ գերազանցում է Եվրամիության հետ Հայաստանի առևտրի ծավալը։

www.armenpress.am

Լրահոս