Ուրսուլա ֆոն դեր Լեյենը ժամանել է Կիև

Եվրահանձնաժողովի ղեկավար Ուրսուլա ֆոն դեր Լեյենն աշխատանքային այցով ժամանել է Կիև։ Նա ընդգծել է, որ ութերորդ այցը կայանում է երկրում ջեռուցման սեզոնի սկզբին։ Կիևում հանդիպումների ժամանակ ֆոն դեր Լեյենը նախատեսում է քննարկել ձմռանն Ուկրաինայի պատրաստվածության մակարդակի հետ հապված հարցերը, գրում է kommersant.ru-ն։

«Ես եկել եմ այստեղ՝ քննարկելու եվրոպական աջակցությունը։ Ձմեռվան պատրաստվածությունից մինչև պաշտպանություն, ԵՄ-ին անդամակցությունից մինչև G7 վարկերի մասով առաջընթաց»,- գրել է ԵՀ-ի ղեկավարը X սոցիալական ցանցում։

Նախօրեին ֆոն դեր Լեյենը հայտնել էր, որ Եվրամիությունը մտադիր է Ուկրաինային օգնել մինչև գալիք ձմեռ վերականգնել էներգակիրները՝ ապահովելու իր էներգետիկ կարիքների 15%-ը։

Ընդհանուր առմամբ ԵՄ-ն, ըստ ԵՀ ղեկավարի, նախատեսում է 9 ԳՎտ կորցրած հզորությունից մոտ 4,5 ԳՎտ էներգիա տրամադրել։ Առաջիկա ջեռուցման սեզոնի համար ԵՀ-ն Ուկրաինային 160 մլն եվրո կհատկացնի էներգետիկ օբյեկտների վերականգնման համար, որից 100 մլն եվրոն կտրամադրվի ռուսական սառեցված ակտիվներից ստացված եկամուտներից։

Ուկրաինայի նախագահ Վլադիմիր Զելենսկին հայտնել է, որ 2024 թվականի հունիսի դրությամբ Ուկրաինայում ոչնչացվել է 9 ԳՎտ էներգիայի արտադրության հզորություն։ Ուկրաինայի էներգետիկայի նախարար Հերման Գալուշչենկոն հայտարարել է, որ երկրին կարող է սպասել «պատմության մեջ ամենադժվար ձմեռը»։