Փաշինյանը հարձակվել է եկեղեցու վրա, որպեսզի չբացահայտվեն գործակալները իշխանությունում. Խզմալյան

Հայաստանը շատ արագ կիսաժողովրդավարական պետության կարգավիճակից անցել է դեպի ավտորիտար ռեժիմ և մեկ քայլ է մնացել՝ գնալու դեպի բռնապետություն. Aysor.am-ի հետ զրույցում նման տեսակետ հայտնեց ՀՀ Եվրոպական կուսակցության նախագահ Տիգրան Խզմալյանը։

«Եվ դրա բնորոշումը տվեց անձամբ Փաշինյանը, ով 2018-ին հայտարարում էր, որ դուք բոլորդ վարչապետ եք, կառավարությունը, պետությունը դուք եք, իսկ 2025-ին ասաց, որ կառավարությունը ես եմ, ով համաձայն չէ` կարող է թողնել և գնալ։ Սա նշանակում է, որ մենք արդեն դարձել ենք ավտորիտար պետություն և գտնվում ենք մեկ քայլի վրա՝ դեպի բռնապետություն»,-ասաց նա։

Խզմալյանը նշեց, որ Փաշինյանը յուրաքանչյուր եվրոպական երկիր այցից հետո զեկույցով գնում է «Մոսկվա, կամ Ալթայ, կամ այլ ռուսաթուրքական դաշինքի մի տեղ հաշվետվություն տալու համար»։

«Նա դիտում է Հայաստանը ռուս-թուրքական ռեգիոնալիստական օրակարգով։ Իրականում այս տարածաշրջանում մենք ոչ թե 3+3 ենք, այլ 5-ը՝ մեկի դեմ, և նա չի կարող չհասկանալ դա»,-ասաց նա։

ՀԵԿ նախագահը նշեց, որ այս ամենն արվում է Փաշինյանի անձնական և կուսակցական շահերով․

«Նրան Ալիևը, Պուտինը և Էրդողանը խոստացել են աջակցություն՝ վերընտրվելու համար, և այդ աջակցությունը ցուցադրվելու է Ադրբեջանի կողմից՝ անկլավների մասով մինչև ընտրությունները ժամանակավոր լռությամբ, Թուրքիայի կողմից, ենթադրում եմ, ապրիլի 24-ին սահմանը բացելով, որպեսզի նա կարողանա ասել՝ տեսե՛ք, ես ձեզ խաղաղություն եմ բերել»։

Խզմալյանը հիշեցրեց, որ 1938-ին Մեծ Բրիտանիայի վարչապետ Չեմբերլենը Մյունխենում Հիտլերի հետ ստորագրեց մի թուղթ, որը ներկայացվում էր որպես խաղաղություն, սակայն մեկ տարի անց սկսվեց պատերազմը. «Մեզ մոտ դա վերափոխվելու է զանգվածային արտագաղթի»։

Արտաքին մարտահրավերների դեմ ներքին քաղաքականությունը, մասնավորապես, եկեղեցու դեմ ձեռնարկված ճնշումները, Խզմալյանը նույնպես դիտարկեց տարածաշրջանային մեծ ծրագրի մաս․«Սա ևս մաս է կազմում մեծ ծրագրի։ Նորմալ երկրներում, նորմալ կառավարությունները, ազգային առաջնորդները կոչված են միավորելու ազգը, համախմբելու ժողովրդին, մինչդեռ Փաշինյանի քաղաքականությունն առաջին օրից ուղղված էր պառակտելուն, ատելություն սերմանելուն»։

Նա հիշեցրեց, որ, ըստ Սահմանադրության, եկեղեցին անջատ է պետությունից և համակարծիք էր, որ ԿԳԲ-ի գործակալները, իհարկե, շատ են եկեղեցում։

«Բայց ԿԳԲ-ի գործակալներին նախ պետք է փնտրել կառավարությունում, ԱԺ-ում, մամուլում, տնտեսության մեջ, նախարարություններում, ԱԱԾ-ում, բանակում, և միայն վերջում, երբ հասարակությունն անցնի լուստրացիա և ազատվի օտար ազդեցությունից, ինքնըստինքյան կմաքրվի նաև եկեղեցին։ Փաշինյանը զբաղվում է եկեղեցով, որովհետև դա միակ կառույցն է, որը իրեն չի պատկանում։ Նա զբաղվում է եկեղեցով, որպեսզի չզբաղվի այդ նույն հարցերով իրեն պատկանող կառավարման ոլորտներում»,-ասաց նա։

www.aysor.am