ՓԱՇԻՆՅԱՆՆ ՈՒԶՈ՞ՒՄ Է ՎԵՐԱԴԱՌՆԱԼ

Անցյալ շաբաթ ե՛ւ ռուսական, ե՛ւ հայկական մամուլում ակտիվորեն քննարկվում էր Նիկոլ Փաշինյանի աշխարհաքաղաքական շրջադարձը դեպի ռուսական ուղեծիր։ «Հրապարակի»՝ այդ թեմայով տպագրած հոդվածն ակտիվորեն մեջբերում էին ռուսական հայտնի տելեգրամյան ալիքներ՝ սկսած Կրեմլի «յուրային» համարվողներից, ինչպես «Սոլովյով-Լայվն» է, մինչեւ ինտերնետային անկախ լրատվամիջոցներ։ Հավելյալ ազդակ է հաղորդում այն, որ Փաշինյանն ընդունել է ՌԴ նախագահի՝ մայիսի 9-ին Մոսկվայում Մեծ հաղթանակի 80-ամյակի մեծ զորահանդեսին մասնակցելու հրավերը։

Ռուս քաղաքագետ Սերգեյ Մարկեդոնովը, անդրադառնալով թեմային, նկատում է, որ լուրը շրջանառության մեջ է դրել «Հրապարակը», եւ շեշտում է, որ «Հրապարակն» է 2023 թվականին գրել, որ Լեռնային Ղարաբաղն Ադրբեջանին վերջնական հանձնման եւ հայաթափման գործում վճռական նշանակություն է ունեցել Նիկոլ Փաշինյանը։ Ռուս քաղաքագետը նշում է, որ, անկախ այն բանից, որ Փաշինյանը մի քանի տարի ձգտում էր դեպի արեւմտյան ուղեծիր, սակայն այդպես էլ վերջնականապես չփակեց ռուսական դուռն իր հետեւից, թերեւս հասկանում էր, որ Արեւմուտքը, չնայած իր շռայլ խոստումներին, ռեալ գետնի վրա Հայաստանին անվտանգության երաշխիքներ չի տրամադրելու։ Եվ հասկանում էր, որ ինչ էլ լինի, չի կարողանա գոնե մի քանի տասնամյակ Ռուսաստանին փոխարինել Արեւմուտքով՝ թեկուզ տնտեսական առումով։ Բացի այդ, Փաշինյանի վարկանիշն այն չէ, ինչ 18-ին էր կամ գոնե 21-ին։ Եվ ամենակարեւորը. աշխարհաքաղաքական փոփոխությունները եւ ԱՄՆ-ի ու Ռուսաստանի միջեւ հարաբերությունների վերականգնումը Փաշինյանին հուշում են, որ սխալ էր պատկերացումը, թե Մոսկվան պատրաստվում է հեռանալ Կովկասից։ Այս շրջադարձը, սակայն, վերջնական չէ, ըստ Մարկեդոնովի, Երեւանից պետք չէ ակնկալել, որ կխզի կապերն Արեւմուտքի հետ, որքան էլ որ ռուսական կողմի համար դա ցանկալի լինի։

«Հրապարակ օրաթերթ»

Լրահոս